لانە عەبدولسەلام، ڕێڤەبەرا مۆزەخانا زاخۆ د دیدارەکێ دا بۆ ڕۆژناما هەولێر دیار کر کو مۆزەخانا زاخۆ ژ پتری 300 پارچەیێن شینواری و فۆلکلۆری پێك دهێت کو هەمی ل دەڤ کەسەکێ هاتبوونە پاراستن بناڤێ محەمەد کۆچەر کو وی پێشکێشی مۆزەخانێ کرن، ئو نوکە هەمی ل ڤێرێ دهێنە پاراستن، ئو مە ل بەرە، ژوورەکا سینەمایێ ل مۆزەخانا زاخۆ ڤەکەین ل دۆر مێژوو و مۆزەخانا زاخۆ، هەر دیسان مە ل بەرە هندەك کەلوپەلان ژ دهۆکێ ژی بەشداری مۆزەخانێ بکەین.
ڕێڤەبەرا مۆزەخانا زاخۆ، ئاماژە ب وێ چەندێ ژی کر کو مەرەم ژ ڤەکرنا مۆزەخانا زاخۆ دیارکرنا زەنگینیا مێژوو و پارچەیێن فۆلکلۆری و شینواری یێن زاخۆیە، داکو گەشتیارێن ناڤخوە و بیانی پێزانین ل سەر مێژوو و فلکلۆرێ زاخۆ هەبیت، ئو هەر گەشتیارەکێ سەرەدانا مۆزەخانێ دکەت پێدڤیە ئێکەم تشت مێژوویا زاخۆ بزانیت.
ئاشکرا ژی کر کو ئێك ژ کەڤنترین پارچەیێن ل ڤێ مۆزەخانێ هاتیە پاراستن بەرێ ئۆکسیدە کو مێژوویا وێ ڤەدگەڕیت بۆ سەردەمێ بەردێ چەرخین یێ ناڤین بۆ ٧هزار هەتا ١٠هزار سالان، ئو دهاتە بکارئینان بۆ بڕینا کەلوپەلان و چێکرنا چەکی و پێدڤیێن جوانکارییێ.
گۆت ژی: “ژ وان پارچەیێن بووینە جهێ سەرنج ڕاکێشانا گەشتیاران ئامیرێ ئێکەم ڕادیۆیا زاخۆ کو مێژوویا وێ بۆ سالا ١٩٥٠ ڤەدگەڕیت، ئو کورسیا ئێکەم مەتڕانێ زاخۆ و بەرێ مەزن یێ کو شوون پیێن مرۆڤێن بەرێ ل سەرە کو ل دەمێ نووژەنکرنا پرا دەلال هاتیە دیتن، ئو پەیکەرێ هەرقەلە کو ئێك ژ ئەفسانەیێن گریکی یێن بناڤودەنگە بۆ سەردەمێ هێلنستی ڤەدگەڕیت، وەکو خوداوەند د هاتە هژمارتن و ل دێرەبینێ هاتە دیتن”.
زێدەتر ژی گۆت: “مۆزەخانا زاخۆ ل هەمی ڕۆژێن حەفتیێ ڤەکرییە ژ دەمژمێر ٩ـێ سپێدێ هەتا ٩ـێ شەڤ، ئو ل وەرزێ هاڤینێ هەتا ١٢ـێ شەڤ دمینیتە ڤەکری، ئو گەلەك کەسایەتیێن بناڤودەنگ ژ دەرڤە و ناڤخوە سەرەدانا مۆزەخانێ کرینە، ئو ئەڤ مۆزەخانە بۆ خەلکێ زاخۆ و یێ ژ دەرڤە یا سەرنج ڕاکێشە”.