هاوکار گەردی:ئەگەر ڕەخنە نەبێ شیعری باش نایەتە بەرهەم
گەرمیان گلی – هه‌‌ولێر
شاعیر هاوکار گەردی، لە ساڵی ١٩٨٥ لە شاری هەولێر لە دایك بووە و لە ساڵی ٢٠١٠ ەوە دوای چەند ساڵ لە خوێندنەوەی شیعری شاعیران دەستی بە نووسین کرد. لە ساڵی ٢٠١٩ بە ئەزمونێکی کەمەوە دوای خوێندنەوە لەسەر چۆنیەتی دەقی گۆرانی لە ڕوی بڕگە و کێش و سەروادا دەستی بە نووسینی دەقی لیریك کرد. وەک خۆی لەو دیمانەیەیدا بۆ “ڕۆژنامەی هەولێر” دەڵێ: ئەگەر ڕەخنە نەبێ شیعری باش نایەتە بەرهەم.
شاعیر هاوکار گەردی باسی بەرهەمە شیعرییەکانی دەکات و دەڵێ: بەرهەمە شیعریەکانی من لە خۆشەویستی و کۆمەڵایەتی و نیشتیمانی خۆی دەبینێتەوە کە زیاتر لە ٢٠٠ دەقە شیعری لیریك و ئازادم هەیە کە لە ساڵی ٢٠١٠ ەوە دەنووسم، وە لە ئێستادا خەریکی پێداچوونەوەم بە دەقە شیعریەکانم تا ئەوەی بەتەواوی ئامادەی بکەم بۆ بەچاپ گەیاندن، دەتوانم بڵێم لە ساڵی ٢٠١٩ فۆڕمی نوسینەکەم بۆ لیریك برد لەبەر ئەوەی دەقی لیریك بۆ گۆرانی دەشێ لەگەڵ ئەوەی ئەزومونێکی کەمم هەیە لە نوسینی دەقی لیریك، بەڵام دەتوانم بڵێم جێگای خۆی کردۆتەوە لای ئەو کەسانەی هۆگری شیعرن.
ئەو شاعیرە دەربارەی شیعری ئێستا و ڕابردوو دەڵێ: ئەگەر چاو بخشێنین بەسەردەمی شاعیرانی ڕابردوو دەبینین لە هەموو ڕوویەکەوە بێ کەم و کوڕی بووە، تێکهەڵکێشێك لە نێو فەرهەنگی کوردی و فەرهەنگی زمانەکانی دراوسێ بەدی دەکرا، وە شاعیرانی ڕابردوو هەم زمان پاراو بون هەمیش ووشەسازیان لە دەقە شیعریەکان کردووە،
بەڵام شاعیرانی ئێستا لەگەڵ ڕێزم هەندێکیان لەبارەی نوسینەوە هیچ زانیاریان نیە و خوێندنەوەیان کەمە بۆ شیعر بەداخەوە زۆرێك لە دەقەکانیان دەچێتە خانەی وڕێنەوە جگە لەوەش پێم وایە هەندێك لەوانەی خۆیان وەکو شاعیر ناساندوە بە نوسینی دەقی ئازاد مێژوی ئەدەبی کوردی و دەقی کێش و سەروا و بڕگەدار ناشرین دەکەن و ڕەت دەکەنەوە.
هاوکار باس لە ئازادی ئافرەت دەکات و دەڵێ: لە ئێستادا ئافرەت ئازادیەکی تەواوی هەیە لەتەواوی کایەکانی ژیان دەتوانم بڵێم ئازادی ئافرەت لە کۆمەڵگەی کوردی هەم زیانی بە داب و نەریت و کولتورەکەمان گەیاندووە هەمیش قازانجی لەهەندێك ڕەهەند بە کۆمەڵگا گەیاندوە، قازانجەکە ئەوەیە ئافرەت هەیە شان بە شانی پیاو سیاسەتمەدارە، هەیە نوسەرە، هەیشە بزنس دەکا ئەوە بۆ پێشکەوتنی کۆمەڵگا هەنگاوی باشە، ئەمما هەندێكجاریش ئازادی زیاد لە پێویست بۆ ئافرەت کیشەی کۆمەڵایەتی دروست کردووە بۆ خانەوادەکان.
ئەو شاعیرە باس لە ڕێگای دەستپێک و کۆتایی شیعر دەکات و دەڵێ: بە بڕوای من باشترین ڕێگا بۆ دەستپێك و کۆتایی هەر دەقێك تابلۆیە ئەگەر ئەو چیرۆکەی کە دایدەڕێژی تابلۆی نەبوو ئەوە ناچێتە بابی شیعرەوە و بەهای نابێ. من بە دوو جۆر فۆڕم دەنووسم هەروەك لە سەرەتاش ئاماژەم پێکرد دەقی ئازاد و لیریك، هەرچەندە ساڵانێکە حەزم کردووە دەقی کلاسیكیش بنووسم، بەڵام لەبەر ئەوەی حەزم نەکردوە دەقی کلاسیك ناشرین بکەم بۆیە نەمنوسیوە، حەزم وایە دوای ئەوەی وردتر دەبم لە خوێندنەوەی دەقی کلاسیكی شاعیرانی پێشوو دواترهەوڵی نووسینی بدەم.
دەیشڵێت: دەتوانم بڵێم کەمێك چەقبەستووە، وە بۆ دەرباز بوون لەو چەقبەستوویەی ئەمڕۆی شیعری کوردی، هەم وەزارەتی ڕۆشنبیری وەك پێویست مامەڵەی لەگەڵ ئەوانە نەکردووە کە هەر لە خۆیانەوە بەرهەمە شیعریەکانیان بە چاپ دەگەیەنن، هەمیش ڕەخنەگرە ئەدەبیەکانمان لە ڕوی ژمارەوە وەکو پێویست نیە، وە من پێم وایە دەبێ کاری جدی بکرێ لەسەر بەرهەمە ئەدەبیەکان و ڕێگری بکرێ لە زیان گەیاندن بە ئەدەبی کوردی. پێم وایە تەکنۆلۆژیا شوێنی کاغەزی بە زیادەوە پڕکردۆتەوە بەوەی زۆرێك لە نوسەران هێندەی سەرقاڵی پەرۆشی بڵاوکردنەوەی بەرهەمەکانیان لە تۆڕە کۆمەڵاتیەکان هێندە بایەخ بەوە نادەن بەرهەمەکانیان بە چاپ بگەیەنن.