رۆحی سپی به‌فر
هه‌رچی حه‌سره‌تی سیاپۆشه
بۆ زه‌مه‌نێ
سپی پۆش ده‌كا!
ئاره‌قی ته‌وێڵی شه‌كه‌تی
خاك ده‌سره‌وێ و
به سڵاوێ
سه‌رخۆش ده‌كا.
***
به‌م نیگاو باوه‌شه
برینی دره‌خته‌كان داده‌پۆشێ و
به‌نجی ئازاریان ده‌كا
به‌م سه‌ماو له‌نجه‌یه
رێگاكانی هیلاكی ئه‌هوه‌ن ده‌كاو
له راڕایی
رزگاریان ده‌كا.
***
وه‌ك فانۆسی ئه‌فسانه
تاسه‌ی چاوه‌ڕوانی
خۆزگه‌و حه‌سره‌ت ده‌شكێنێ!
كفنی بێده‌نگی
ده‌خاته به‌رئه‌م قه‌ره‌باڵغییه
گۆرانی
ئارامی ده‌خوێنێ.