كتێبی (مافه‌كانی خانه‌نشینی فه‌رمانبه‌ران) له ئاماده‌كردنی فه‌تحی مسته‌فا كاخدر كاكه‌شین كه‌وته به‌رده‌ستی خوێنه‌ران.
ئه‌م كتێبه زنجیره (12)ی كتێبی په‌یمانگه‌ی په‌ره‌پێدانی ئه‌منی و كارگێڕی و ته‌كنه‌لۆژیای زانیاری وه‌زاره‌تی ناوخۆی هه‌رێمی كوردستانه، بابه‌ته‌كانی په‌یوه‌ستن به خانه‌نشینی پله‌ی گشتی و پله‌ی باڵاو خزمه‌تی زانكۆیی و دادوه‌ران و چۆنییه‌تی ئه‌ژماركردنی مووچه‌ی خانه‌نشینی و به‌ركه‌وته‌ی شایسته‌داران له جێنشینه‌كانی فه‌رمانبه‌رو خانه‌نشینی كۆچكردوو، هه‌روه‌ها ئه‌ژماركردنی خزمه‌ت و یاساكانی خانه‌نشینی. به‌رایی ئه‌م كتێبه له‌لایه‌ن هێمن میرانی به‌رێوه‌به‌ری گشتی دیوانی وه‌زاره‌تی ناوخۆ نووسراوه.
ئاماده‌كاری ئه‌م كتێبه فه‌تحی مسته‌فا كاخدر له پێشه‌كی كتێبه‌كه‌یدا باس له مه‌به‌ستی هه‌ڵبژاردنی ئه‌م بابه‌ته ده‌كات و ده‌ڵێت: بۆ زیاتر ئاشنابوونی فه‌رمانبه‌ران به زانیاری و شاره‌زایی زیاتر له‌سه‌ر پرۆسه‌ی خانه‌نشین بوون و ئه‌و مافانه‌ی كه ده‌یانگرێته‌وه، باس له‌وه‌ش ده‌كات كه ئه‌م كتێبه تایبه‌ته به فه‌رمانبه‌رانی ئاسایی و به‌شێوه‌یه‌كی ساده نووسراوه تا ئاشنابن به مافه خانه‌نشینییه‌كانیان، به پشتبه‌ستن به مادده‌و ده‌قه یاساییه كارپێكراوه‌كان ئاماده‌كراوه.
ئه‌م كتێبه له‌دوو به‌ش پێكهاتووه، به‌شی یه‌كه‌میان تایبه‌ته به گشت بابه‌ته‌كانی خانه‌نشینی و مافه‌كانی فه‌رمانبه‌ری خانه‌نشینكراو و چۆنیه‌تی ئه‌ژماركردنی خزمه‌ت و پاداشتی خانه‌نشینی كه به‌شێوه‌یه‌كی ساده‌ی یاساییانه‌و ورد باسكراوه، به‌شی دووه‌میشیان بریتین له‌و یاسا به‌ركارانه‌ی تایبه‌تن به بواری خانه‌نشینی به‌هه‌ردوو زمانی كوردی و عه‌ره‌بی.
(خه‌بات) ده‌ستخۆشی له نووسه‌ر ده‌كات بۆ ئه‌و به‌رهه‌مه به‌پێزه‌ی نێو كتێبخانه‌ی كوردی و خه‌رمان به‌ره‌كه‌ت.