نووسه‌ر ” ساڵح محه‌مه‌د ساڵح”، به‌رگی یه‌كه‌می كتێبی (كه‌سایه‌تییه‌كانی ڕواندز)ی چاپ و بڵاو كرایه‌وه.
له‌باره‌ی كتێبه‌كه نووسه‌ر “ساڵح محه‌مه‌د ساڵح “راگه‌یاند “له‌م كتێبه‌دا كه (400) لاپه‌ڕه‌ی مامناوه‌ند له‌خۆ ده‌گرێت، ئاماژه به ژیاننامه‌ی به‌شێک له كه‌سایه‌تییه‌كانی شاری ڕواندز دراوه، كه جێپه‌نجه‌یان له مێژووی شاری ڕواندز و كوردستاندا هه‌بووه”.
له درێژه‌ی لێدوانه‌كه‌یدا ساڵح محه‌مه‌د ساڵح وتی “هه‌وڵم داوه ژیاننامه‌ی ئه‌و كه‌سایه‌تیانه له‌هه‌موو ڕوویەكه‌وه بخه‌مه ڕوو؛ خه‌باتی شۆرشگێڕ و پیشه‌یان له‌گه‌ڵ ژیانی ئاواره‌یییان و چه‌ندین لایه‌نی تر؛ بێگومان بۆ ده‌ستكه‌وتنی زانیاری و ژیاننامه‌ی ئه‌و كه‌سایه‌تیانه، له رێگه‌ی په‌یوه‌ندی به بنه‌ماڵه‌کەیانه‌وه زانیاریم لێ وه‌رگرتوونە و، وه‌كو خۆی خستوومه‌ته ڕوو”.
له كۆتاییی لێدوانه‌كه‌یدا نووسه‌ر ساڵح محه‌مه‌د له ماڵپه‌ڕی كوردستان تیڤیەوە وای گوت: “زۆر سوپاسی هه‌موو ئه‌و كه‌سانه ده‌كه‌م كه هاوكارم بوون له پێدانی زانیاره‌كان؛ هیچ كارێكیش بێ كه‌موكووڕی نابێت، هیودارم خزمه‌تێكم به كتێبخانه‌ی كوردی كردبێت.”
شایانی باسه ئه‌مه سێیه‌م كتێبی نووسه‌ر (ساڵح محه‌مه‌د)ە كه به‌چاپی گه‌یاندبێت؛ كتێبی یه‌كه‌م له‌سه‌ر مێژوو و بیره‌وه‌رییه‌كانی شاری ڕواندز بوو به ناوی “ڕواندز مێژوو بیره‌وه‌ریه‌كان” (564) لاپه‌ڕه‌یه، كتێبی دووه‌م “مێژوو و ڕۆژژمێری كوردی” (236) لاپه‌ڕه‌یه؛ ئێستایش كتێبێكی تری به ناوی” گه‌مه و یاریه‌كانی جارانی ڕواندز” كه (260) لاپه‌ڕه‌یه ئاماده‌یه بۆ چاپ؛ نیاز وایه به‌م زووانه ئه‌ویش چاپ بكرێت.
نووسه‌ر ساڵح محه‌مه‌د ساڵح، ساڵی 1956 له شاری ڕواندزدا له‌دایك بووه؛ ساڵی 2004 ده‌ستی به نووسین كردووه. یه‌كه‌م نووسینیشی له ڕۆژنامه‌ی “زاری كرمانجی”دا بڵاو كراوەته‌وه؛ له‌و ساته‌وه تائێستا به‌رده‌وام له گۆڤار و رۆژنامه‌كان ده‌نووسێت.
ناوبراو ساڵی 1979 بە فه‌رمانبه‌ر ده‌مه‌زراوه؛ ساڵی 1986 بۆته به‌رپرسی بنكه‌ی وه‌رزش و لاوانی ڕواندز، له ساڵی 2001 ساڵه گواستراوه‌ته‌وه كتێبخانه‌ی گشتیی ڕواندز و، بۆته به‌ڕێوه‌به‌ر؛ ساڵی 2019 خانه‌نشین كراوه؛ له‌و كتێبخانه‌دا چه‌ندین چالاكی جۆراوجۆری کردووه، وه‌ک كردنه‌وه‌ی خولی جۆارجۆر و كردنه‌وه‌ی پیشانگای كتێب و شێوه‌كاری؛ هه‌روه‌ها چه‌ندین كۆڕ و سمیناری ساز كردووه؛ ئێستاکە زیاتر سه‌رقاڵی نووسین و خوێندنه‌وه‌یه.