لێرەم ..
لێرەش لە دایكبووم
لە نیشتیمانی ئەوینتا
فرچكم گرت و ..
گەورەبووم
گەورە بەقەت باڵای ئەزمڕ
بڵند وەك شیعر
سلێمانی
تۆ سۆمای چاوی گۆران و
خامەی بڕشتی مەولەوی
تۆ چلچرای،..
دیوانە شیعری (سالم )و (بێسارانی)
تۆ نەعرەتەی،..
هێزی هەڵمەت و قوربانی
سلێمانی
لەگەڵ زیكرو نزای نوێژا
پەنا بۆ ڕۆشنایی خەندەو
سیمای چاوانی تۆ ئەبەم
سلێمانی
ئەی ئامێزی میهرەبانی
تۆ دارولموڵكی بابان و
سیمای سەوزی ئاوەدانی
٭٭٭
سلێمانی
پرچی ڕەشی،..
ڕەشماڵی ڕەشەبای شارو
گەردنی زەردی (گڵەزەردە)
لە باوەشی نەرمی گۆیژەو
لەبێشكەی سۆزوگریانی سەیوانەوە
خەونێكی ڕەنگئەرخەوانی
بەتەوێڵی نوورانی حەزرەتی نالی و
ئاسكەكانی كانێسكانەوە ئەبینێ !
٭٭٭
لێرەم
دێم و بە ئەسپایی
بەئاسمانی نیشتیمانی دڵی شێخ دا
ڕائەبرم و..
ئەبمە كۆتری سپی ئاشتی
لەبەر سەرا
دێم و لەوێ پەنجەرەیەك
لەكوختی ڕووخاوی (كوردی) و
لە ئاسیاوەكەی (قانع) و
كەشتی نووحی (نەجمەدین) و
چاپخانەكەی پیرەمێرد و
لەدیواری داڕووخاوی
سیتەكی فایەق بێكەسدا ئەكەمەوە
دێم و
خۆر دائەگرمەسەر
ئاسمانی تەڵخی سلێمانی
دێم، مانگ ئەكەم بەچلچرای
ڕووناكی شەوانی تاری
(خانووە قوڕەكان)
دێم لەگەڵ ئازارەكانتا ئێشك ئەگرم
دێم بۆ تفەنگی سلێمان پاشا
لە سیمای سپی بابان و قەڵاچوالان
ئەبمە ناونیشان و سێرە!
دێم، چاوم
ئەبڕمە چاوی ڕەنگاڵەیی
شاخی ڕەنگاوڕەنگی گۆیژەو
نیشتیمانی سەوزی جریوەی ئەستێرە!
٭٭٭
ئێستا لێرە
قەڵەمی شار
تاریخی عیشقی من و تۆ
لەسەرلەپی،..
دەستی سەوزی سەرچنارو
فەقیانەی سپی بەفرینی،..
دەستی شێخ ئەنووسێتەوە !
ئەو تاریخەی
مناڵیم لەسەر هەلۆركەی
پشتی بێشكەی بەرزنجەوە
ئەهێنێتەوە ناودڵی
شاری سپی سلێمانی
دڵی حەپسەخانی نەقیب
شاری ئەختەری ڕەشۆل و
شیعری ئاگرینی شێركۆ !
خەڵوەتی نیگای نوورانی برایم پاشاو
زەماوەندی خوێنی بەفرو
پڕیشكی پشكۆ !
بانگەوازی گەڕانەوەی
شەوی یەڵداو
بەهاری نێرگزو ئاگر
دێم و لەگەڵ
بەهاری گوڵ و نێرگزدا
بە بابەگوڕگوڕی گڕدا
بەچنگێ گڕ
دێمەوە ناو سیمای سەوزی،..
بەرانان و مامەیارە!
لەوێ لەگەڵ پیرەمێردا
نەورۆز ئەكەمەوە ئاشنای
كارێزی وەستا شەریف و
ڕەمزی ڕابوونی ئەوشارە !
ئەوسا سلێمانی و نەورۆز
ئەبنە نەزری عیشقی پیرۆز
سلێمانی
ئەی وەتەنی پڕ لەخۆزگەو
ئاواتی دڵ و دەروونم
سلێمانی
(مەفتوونی تۆم)
خۆشمدەوێی پڕ بە بوونم
٭٭٭