وەرە پاییز وەرێنە داخ و دەردم
لە چەشنی ئارەزووی ژاکاو و زەردم
بدە بەر گەردەلوول سوتووی هەناوم
لە گەڵ تۆزی دڵی پێخوست کراوم
بە هەورانت بڵێ با شین بگێڕن
لە جێی خوێن خاکەکەم با ئاوبدێرن
بگرمێنن لە گەڵ نرکە و گوڕانم
بتارێنن سوپای غەدر و خەمانم
بە شمشاڵت بتوڕێنە لە زۆزان
لە دەنگ پڕکە هەواری عێڵ و هۆزان
دەبا سێڵاوی رەشبەختی سەری بێ
کەسک بێ داری هیوام و بەری بێ
بپشکوێ سوور گوڵی رووی یاری دوورم
بپچڕێ بەند و داوی سەر سنوورم