شاعیر و نووسەر گوڵزار فەرەج بۆ هەولێر: شیعر خاڵیبوونەوەی ڕۆحە
ئێمەی ژن دەبێ ناسینێكی دروستمان هەبێت بۆژیان و دەبێ بەدوای ئامانجێكەوە بین، ئامانجێك گەورەتر لەژیان زۆر ئاشناو خولیای خوێندنەوەی كتێبم، پێیشموایە گەر نووسەر لەكتێب داببڕێ، ناتوانێ وشەیەك بنووسێت.
خاتوونی شاعیر و نووسەر “گوڵزار حەمە فەرەج خورماڵی”لەساڵی ١٩٧٣ لە خورماڵ سەر بەپارێزگای هەڵەبجە لەدایكبووە؛ وەك خۆی گوتەنی: سەرەڕای بوونی مەیلێكی زۆرم بۆ نووسین و خوێندنەوە و تۆكمەبوونی نووسین لە نێو ناخمدا، دەستم دایە قەڵەم وبە ئەندازەی مومكین، هەوڵم دا لە جیهان هەستدا ئەم مەیل و حەزە زاتیەی خۆم واڵاكەم و بنووسم لەهەموو بوارەكاندا ئەم مەیلە خۆڕسكەم وەڵامدەری حەزو بەرزەفڕی ناخم بێت، ئێمەی ژن ئەبێ ناسینێكی دروستمان هەبێت بۆژیان كە ئاماژەیەكی هەر چەند كورتیش بێت، بەڵام بەدوای ئامانجێكەوە بین ئامانجێك گەورەتر لەژیان، بۆ چنینی بەرهەمی زێدەتری لە باخی جوانی ژیان، هەگبەی خۆمان لەبوارەكانی ژیاندا پڕ بكەین كەسوودی هەبێت بۆ خۆمان و دەوروبەرمان، لەچەندین بوار و شوێندا ئەنووسم ونووسین وەك خۆراكی رۆحمی لێهاتووە، هەر ئەو حەزە زاتیەش بوو كە بتوانم ببم بە خاوەنی شەش كتێبی خۆم.
ـ پێناسەت بۆ شیعر چیە و شیعر لای تۆچی ئەگەیەنێت؟
شیعر چڕتڕین دەڕبڕینی زمانە
ـ بۆچی شیعرت هەڵبژارد؟
شیعر خاڵیبوونەوەی ڕۆحە، ئەوەش یارمەتیدەری ئارامی و دەربڕینی ساتە خۆش و ناخۆشەكانی ژیانە.
ـ ئێستای شیعری كوردی چۆن دەبینیت؟
هەرئەوەندە ئەڵێم: ئێستای شیعری كوردی وێرانەیە چونكە شاعیرمان زۆرە و شیعرمان كەمە.
ـ شیعرت بۆ پیاو نووسیوە؟
بەڵێ نووسیومە.
ـ شیعر بۆ كێ دەنووسی و ئامانجت چییە لەنووسیندا؟
من شیعر بۆ هەمو چین و توێژ و جوانییەك و خەم و نەهامەتیەكی دنیا دەنووسم.
ـ ئاشنایەتیت لەگەڵ كتێبدا چۆنە؟
زۆر ئاشنا و خولیای خوێندنەوەی كتێبم، پێشموایە گەر نووسەر لەكتێب داببڕێ ناتوانێ وشەیەك بنووسێت.
ـ كێ هاوكار و هاندەرت بووە لە بواری نووسیندا؟
ـ سەرەتا ئەندامانی خێزانەكەنم بەتایبەتی هاوسەرەکەم.
ـ بەرهەمی چاپكراوت هەیە؟
شەش بەرهەمی چاپكراوی خۆمم هەیە، لە بواری شیعرو ڕۆمان و پەخشانی كوردی لەوانە: چەپكێ گوڵی نێرگز، باوك، هیوایەكی نوێ، پەیكەری شۆخێك، رازەكانی ژیان و، زانستی جەستەیی.
ـ پیرۆزیی خاكی نیشتمان و پیرۆزیی پێشمەرگەو گەورەیی شەهیدان لەكوێی شیعرەكانتدایە؟
هەموو كات نیشتمان، پیرۆزی و خۆشەویستیی خۆی هەبووە لە شیعرەكانمداو هاوكات شیعریشم بۆ پێشمەرگە و گەورەیی شەهیدان و كۆچی ئازیزان و غوربەت نووسیوە.
ـ قەڵەمی ژن لەنووسیندا چۆن دەبینی وئایا تا چەند قەڵەمی ژن بۆتە داكۆكیكار لە مافی ژنان؟
شاعیرانی ژن بەهێزن چونكە هەم دایكن و هەم بەرپرسیاری خێزانن؛ هەم خەمخۆری وشەو ئەدەبی كوردین، بەشێوەیەكی بەرچاو زیندوویەتیی پێوە دیارە؛ قەڵەمی ژن بەم ڕۆژگارە بۆتە دەرخستنی ئازارەكان و داواكارییەكانی بەشێوەیەكی بەرچاو.
ـ بوونی سایتە ئەلیكترۆنیەكان نەبوونەڕێگر لەبەردەم پیرۆزی و گرنگی كتێب و خوێندنەوەو نووسین؟
پەیوەندیەكی ڕێژەیی بۆتە هۆی دوورخستنەوە بەڵام خوێنەری ڕاستەقینەی كتێب هەر ماوە.
ـ بەرنامە و پڕۆژەی داهاتووت چیە؟
ڕۆمانێكم لەبەردەستدایە ئەگەر تەمەن باقی بێت، ئیشەڵا بتوانم چاپی بكەم.
ـ پێناسەت بۆ ئەمانە؟
ئەشق: ئەو ئازارەیە كە مرۆڤی پێ دێتەگۆ؛
غوربەت: ئەو هەناسە كورت كورتانەیە كە ڕەنگە هەندێ جار دڵ لەلێدان بكەوێت، لەتاو حەسرەتی دووریی وڵات؛
سلێمانی: لانكەی جوانی و میواندۆستی و فەرهەنگی ڕۆشنبیری؛
گوڵزار فەرەج: پڕم لە هیوا وەك گوڵێكی نێو سروشت؛
پیری: دیاردەیەكی ئیلاهیەو هەر دەبێ ببێ بۆ كامڵبوونی كارەكانی پەروەردگار؛
ژیان: زۆر شتی جوانی لێ سەندم و لەبەرامبەریشدا جوانتری پێدام؛
تەمەن: قوتابخانەیەكە بۆ مرۆڤایەتی، هەندێ جار مرۆڤی جوان بەرهەم دێنێ و هەندێ جار بێهیوات ئەكات، لە مرۆڤانێك كە بارتەقای شاخێك بەرز لێت ڕوانیون؛
مردن: میوانێكی ئازیز؛
تەنیایی: گونجاوترین كاتە كە مرۆڤ خودی خۆی تێدا دەناسێت.