اوراق من حصاد العمر لەپەراوێزی تەمەندا

حەمەئەحمەد جاف – هه‌ولێر

( اوراق من حصاد العمر) کتێبێکی تایبەتی (مامۆستا عەبدولخالق عەبدولکەریم بەرزنجی) یە کە بەبۆنەی یۆبێلی زێڕینی پەنجاساڵەی تەمەنی یەکەم نووسینی ئەدەبی خۆی، بەهەردووزمانی عەرەبی و کوردی چاپ و بڵاوکردۆتەوە، کەچەندین بابەتی ئەدەبی لەخۆگرتووە لەوانە ( قەسیدە، چیرۆک، ڕەخنە، وتاری ئەدەبی، زمان، خوێندنەوەی کتێب، وەرگێڕان ) بەهەردوو زمانی کوردی و عەرەبی لە نێوان ساڵی (1972 هەتا 2022 ) کەلەلایەن برای نووسەر ئامادەکراوەو، بەدیزاینێکی جوان و قەشەنگ چاپ و بڵاوکراوەتەوەو لەو ماوەیەدا لە مەراسیمێکی شایستەوقەشەنگدا کەوتە بەر دیدی خوێنەران.

شایانی باسە ئەم کتێبە پێشکەش بە پەنجاساڵەی شەهید بوونی نووسەر و فەرماندەی شەهیدی فەلەستینی (غەسان کەنەفانی) کراوە، لەگەڵ پێشەکیەک بەناونیشانی (دەروازە) بەقەڵەمی نووسەر کە تێیدا دەڵێ :
دوای ئەوەی لە نووسین و ئامادەکردن و چاپکردنی چوار لە کتێبەکانی ئەو دواییەم بوومەوە کەلە ساڵی 2021 دا بە هەردوو زمانی کوردی و عەرەبی بە چاپم گەیاندن، جارێکیدی کەوتمەوە خۆ بۆ ئامادەکردن و کۆکردنەوەی، ئەونووسینانەی ماون و چاپم نەکردوون، بیانکەمە کتێب ولە ئایندەدا بەچاپیان بگەیەنم
بۆیە لەوکتێبەی بەردەست و دیدەتان ئەو نووسین و بابەتگەلانە بەهەردووزمانی کوردی و عەرەبی بەرچاو دەکەون، کەتا ئێستا ڕۆشناییان لەناو کتێبەکانمدا نەدیوون،، ئومێدەوارم سوود بەخش بن .
هەروەها دەڵێت :
لەگەڵ ڕێزو خۆشەویستیم بۆ خوێنەرانی ئەو کتێبە، سینەشم فراوانە بۆهەر ڕەخنەیەک کە ئاڕاستەم دەکرێ .
شایانی باسە ئەو کتێبە
چەندین وتارو شیعرو چیرۆکی وەرگێڕدراوی (لەکوردی بۆعەرەبی) گرتۆتە خۆی لەوانە:شیعرو سیڤیی ژیاننامەی شاعیران
( حەمە ئەحمەد جاف، ژوان سورچی، نیازی حەمە عەزیز ئارام ساڵح، لەتیف فاتح فەرەج، ئاورنگ بەرزنجی و چەندین شیعری شاعیرانی دیکەی وەرگێڕدراو لەوانە : (لەتیف هەڵمەت،فەرید زامدار ڕۆژهەڵەبجەیی، نەوزاد ڕەفعەت، ئیسماعیل بەرزنجی، عمر کەسان، عەبدولقادر سەعید، داستان ئاسودە ) لەگەڵ کۆمەڵێک چیرۆکی وەرگێڕدراوی چیرۆکنووسانی وەک : دکتۆرعەبدوڵڵا ئاگرین، حسام بەرزنجی، د. هاوژین سڵێوە، فوئاد سەڕاج، لەگەڵ چەندین وتار بەقەڵەمی نووسەرخۆی سەبارەت بە ( ڕێککەوتنامەی یانزەی ئازاری مێژوویی 1970 و کارەساتی خوێناوی قەڵادزێ 1974، خوێندنەوەی کتێبی ( القبائل الکوردیە) و( المشهد الثقافی فی عنکاوا ) زۆر بابەتی تری هەمەچەشنەی وەرگێڕدراوی ڕەخنەیی و ئەدەبی و ڕۆژنامەنووسیی.
لەکۆتاییدا بە مامۆستای نووسەرو وەرگێڕ دەڵێین: پیرۆزە و خەرمان بەرەکەت..