سەجا شێرزاد – دهۆک
زێدەبوونا ئەندامێن گروپێ وێژە رامانا باشتركرنا ئاستێ خواندنێ یە ل زاخۆ د گەرمەگەرما سوشیال میدیایێ دا و سەردەمێ لەزاتیێ، هندەك ئاسان نینە حەزژێكەرێن لاپەر و پێنووس و خواندنێ دیار ببن، لێ دگروپێ وێژە دا، ئەڤ چەندە بەروڤاژی بوو.
100 كەس ژ كوڕ و كچێن ئاکنجیێن زاخۆ وەكو گروپەك خرڤەبووینە ب تایبەتی، ژبۆ بەردەوامی دان ب هونەرێ پەرتووك خواندن و دیفچوون و گەنگەشەكرنێ لسەر، ئەڤ هزرە ب تایبەتی ژ لایێ بێوار ئەكرەمی رێڤەبەرێ وەرزش و لاوان ل زاخۆ هاتییە كرن و بجەهئینان، گروپێ وێژە ل ساڵا 2021ێ هاتییە دامەزراندن و بێوار ئەكرەم ژی دامەزرێنەرێ وێ، هوازنڤانەكێ ب ناڤ و دەنگێ دەڤەرا زاخۆیە، كو هەتا نوكە و دماوێ كێمتر ژساڵەكێ ژمارا ئەندامێن گروپی گەهشتییە 100 كەسان، و بێوار ئەكرەم دبێژیت، ئەم وەكو گروپێ وێژە ب خێرهاتنا هەر ئەندامەكێ دكەین ژهەر چین و نەتەوەكێ بیت ب مەرجەكێ ئەو ژحەز ژێكەرێن خواندنێ بیت.
ب گور گوتنا بێوار ئەكرەمی ئەوی ئەو هزر كرییە چونكە ل ڤان دویماهییان گەلەك نڤیسەر هەنە ئارمانجا وان یان سەرەكی ئەوە ب تنێ ژمارەیێن پەرتوك و بەرهەمێن وان زێدە ببن، لێ ب هەبوونا گروپێن وەكو وێژە ئەڤ ئاریشە دێ كێم بیت، چونكە دێ خواندەڤان زێدەبن و گەل زێدەبوون دێ ئاستێ رەوشەنبیری یێ گەنجێ مە بلند بیت و هۆسا دێ بۆمە ڤەكولەر و رەخنەگر ژی پەیدا بن.
گروپێ وێژە ل هەر 15 رۆژان پەرتوكەكێ دهەلبژێرن بۆ خواندنێ و ل رۆژا 15ێ نڤیسەرێ پەرتووكێ دهێتە مێهڤانكرن بۆ روینشتن و گەنگەشەكرن لسەر پەرتووكێ، لێ جاران هەیە نڤیسەرێن باژێرێن هەرێمێ ژ لایێ خۆڤە دخوازن پەرتووكێن وان بكەڤنە ناڤا پلانا گروپێ وێژە دا وبكەڤنە ژێر دان وستاندن و گەنگەشكرنێ، چونكە ب دان و ستاندنێن هۆسا نڤیسەر گەلەك سەرنج و تێبینیان بۆ خۆ دهەلگریت و پەرتووكا وی ب رێژەیەك باشتر دهێتە خواستن.
هەتا نوكە 21 پەرتووك ژ لایێ گروپێ وێژەڤە هاتینە خواندن؛ ژ وان پەرتووكان ژی ئێكەم رومانا كوردی یا (شڤانێ كرمانجا) یا عەرەبێ شەمو هاتییە هەلبژارتن و دانوستاندن لسەر هاتییە كرن، هەرچەندە نڤیسەرێ رومانێ زیندوو نەمایە، لێ ئەوان تیپ گوهورێ وێ ئینایە بۆ گەنگەشەكرنێ لسەر.
سەرساڵا گروپێ وێژە گەلەك نێزیك بوویە و ئاوان پلان و ئارمانجێن مەزنتر بۆ ساڵا خۆ یا نوی داناینە.