“زۆرینەی ئەو شیعرانەى نووسیومن بۆ پیاوە”
ناسك حەمەغەریب، لەدایكبووی شاری سلێمانی ساڵی ١٩٧٢ لە ساڵی ١٩٩٨ دەستی كردووە بە نووسینى شیعر هەروەك بۆ خۆى دەڵێت: تا ئێستا نەمتوانیوە و ناشتوانم نازناوی شاعیر لە خۆم بنێم بەڵام من هەمیشە هەستێكی ناخی خۆمم هەیە و بەو شێوازە ئەینووسمەوە.
_ پێناسەت بۆ شیعر و شیعریش لای تۆ چی دەگەیەنێت؟
شیعر هەستە ئامرازێكە بۆ گەیاندنی پەیامەكانی ناخی مرۆڤ بە شێوازێكی هەستبزوێن، واتە لای من شیعر ئارامییە. ئەو كاتەی ناخم قوڵپ ئەدات بە خۆشی یان ناخۆشییەكانی ژیان شیعر نووسین بۆ من دەبێتە دەرمانێك ئاسوودە و ئارامم دەكاتەوە.
- بۆ شیعرت هەڵبژارد؟
من شیعرم هەڵنەبژاردووە، بەڵكو شیعر منی هەڵبژاردووە و ئەویش هێزی نووسینی پێ داوم. - ئێستای شیعری كوردی چۆن دەبینی؟
من نازانم بڵێم چی لەكاتێكدا،خەڵك ئەو بڕیارە ئەدات یان باشتر بڵێم شارەزایانی بواری شیعر دەتوانن ئەو وەڵامە بدەنەوە. ئێستاکە نووسین زۆرە بەس ناتوانرێت بە هەمووی بوترێت شیعر. - شیعرت بۆ پیاو نووسیوە؟
(بە پێكەنینەوە) زۆرینەی ئەوشیعرانەى من نووسیومە بۆ پیاوە. - شیعر بۆ كێ دەنووسیت و ئامانجت چییە لە نووسیندا؟
من ئەوەی ئەینووسم ڕازەكانی ناخی دڵمە و ئەیگەیەنمە شوێنی مەبەست.. شیعر بۆ خۆشەویستی ئەنووسم ئیتر خۆشەویستییش شێوازی زۆری هەیە نەك هەرنێوانی ڕەگەزی نێر و مێ. - ئاشنایەتیت لەگەڵ كتێب و خوێندنەوەدا؟
من هەر لە منداڵیمەوە ئاشنام بە خوێندنەوە وەك خانەوادەش خوێنەرێكی باشین، هەرچەندە ئێستا بەهۆی ئەوەی لەدوورى نیشتمان و غوربەتدا دەژیم و ئەركێكی زۆرم لەسەرە كەمتر دەخوێنمەوە بەس هەر دانەبڕوام جگە لە كتێب خوێندنەوەی زۆرم بۆ بابەتەكانی ناو تۆڕە كۆمەڵایەتییەكان هەیە. - كێ هاوكار و هاندەرت بووە لە نووسیندا؟
كەس هاوكار و هاندەرم نەبووە وەك هاوكار و هاندەری سەرەكیش بەس باوكم شیعری دەنووسی و هەمیشە كۆڕی گەرمی هەبوو لە ماڵەوە و گەنجانی لە خۆ كۆ دەكردەوە لەوانەیە ئەوەش وایكردبێت ئەو هەستەش لە ناخی مندا ببزوێت و، لەوانەشە خۆشم ئەو بەهرەم تیا بێت. - بەرهەمی چاپكراوت هەیە؟
هەرچەندە كۆمەڵێك نووسینی جوانم هەیە بەڕای هەوادارانم،بەس كەمێك تەمبەڵی خۆم و نەبوونی كات و نە ڕەخسانی بوارێكی گونجاو هیچم بەچاپ نەگەیاندووە لەبەرنامەمدا هەیە ئەگەر خودا ڕێم بدات. - پیرۆزیی خاكی نیشتمان و گەورەیی شەهیدان لە كوێی شیعرەكانی تۆدان؟
كە من باس لە شیعرو خۆشەویستی دەكەم، هەڵبەت پیرۆزیی خاكی نیشتمان وگەورەیی شەهیدانیش، بەشێكن لە هەست و نووسینەكانی من و، دڵیشم زۆر لەوە گەورە ترە كە تەنها جێگای ئەوینی دووكەسی بێت. - ڕەنگدانەوەو كاریگەریی مەرگی ئازیزان و كۆچ و جێهێشتنی نیشتمان لە شیعر و نووسینەكانتدا؟
شیعر و نووسینەكانی من هەموو شتێك لە خۆی دەگرێت كە لەگەڵ بوونی ساتەكانی تەمەنماندایە. - قەڵەمی ژن، لە نووسین و شیعردا چۆن دەبینی و تاچەند ئەو قەڵەمە بۆتە چەكی داكۆكیكار لە مافەكانیان و چارەسەری كێشەكانیان؟
من حەزدەكەم پێش ئەوەی وەڵامى ئەم پرسیارە بدەمەوە شتێك سەبارەت بە وشەی ژن بڵێم: ژن لای ئێمە واتە ئەو خانمەی هاوسەرگیری كردووە بۆیە كە دەڵێن ژن، كچانمان ناگرێتەوە جوانترە بوترێت خانمان. وەك خودی ناسك پێشنیار دەكەم ئەو دوو وشەیەى (ئافرەتان و ژنان) لاببرێت و بكرێتە خانمان ، ئێمە ئێستا زۆرێك لە خانمانمان دەنووسن و زۆر جوانیش دەنووسن بەس وەك كاریگەری لەسەر دەستەبەركردنی مافەكانمان پێم وانییە هیچمان كردبێت. - بوونی پەیج و ئەكاونتی فەیسبوك و سایتە ئەلەكتڕۆنیەكان نەبوونە ڕێگر لەبەردەم پیرۆزیی و گرنگی كتێب و خوێندنەوەو نووسین؟
بەڵێ ئەوە ڕاستییەكی حاشاهەڵنەگرە لەم زەمەنی تەكنەلۆجیایەدا، مرۆڤەكان زۆرێكیان سەرقاڵی ئامێرە ئەلكترۆنییەكانن و بواری خوێندنەوەی كتێب یان باشترە بڵێم: تاقەتی كتێبخوێندنەوەیان نەماوە. ساڵی نەوەدەكان من بۆ خوێندنەوەی كتێبی (ژانی گەل)ـەکەى مامۆستا ئیبراهیم ئەحمەد سێ جار لە هەفتەیەكدا چوومە ماڵی (كاك باست)ی برام تا تەواوم كرد، چونكە ڕووم نەدەهات داوای لێ بكەم بمداتێ بیخوێنمەوە، قەت بیرم ناچێت چێژی ئەو خوێندنەوەیەم تاكو ئێستا لە بیروهزردا ماوە. - پێناسەت بۆ ئەمانە:
- غوربەت
ئازارو دابڕانە لە چێژی خۆشی و هەتا ناخۆشییەكانی ژیان بەشێوازێكی ئاسایی - ئەشق
هەم ژیانە، هەم مردن - سلێمانی
واتە بوژانەوەی ڕۆحی من و بەخشینی دووبارە بە جەستەم - پیری
تەنها گۆڕینی ژمارەى ساڵەكانی تەمەنە - ژیان
ئەو دەمەی دێمەوە ئامێزی نیشتمان - تەمەن
بناغەی دروستبوونمانە تا دەگەینە كۆتایی - مردن
ئەو دەمەیە مرۆڤ بێئومێد دەبێت لە هەموو شتێك - تەنیایی
واتە دۆزینەوەی خود.