وەرە با دەستی ئەو ڕێگایانە بگرین کە دەمانبەنەوە لای یەک

هوشیار عەزیز

وەرە با بەفر بکەینە بیانوو بۆ ئاشت بوونەوە
بیکەینە بیانوو بۆ دڵ سپی بوونەوە
بیانوو بۆ داگیرساندنەوەی ئاگردانی دڵ
بۆ گەرم کردنەوەی خۆشەویستی ..
…
وەرە با تکا لە باران بکەین ببارێت
تا بەو بیانوەوە پیاسەیەکی ئێوارانە
وەک نانی تیری
ئەم بیابانەی نێوانمان تەڕ بکات
ئەم دێراوی وشکھەڵاتوی ئەڤینەمان پاراو بکات
…
نزا بەرینە لای ڕێستۆرانتێک و پێی بڵێین
تکایە لەسەر خوانێکی خۆت
وەک جاران کۆمان بکەرەوە
وەک جاران دڵمان لەیەک بدەرەوە ..
بماندەرە وە دەست پێکەنین بەو سۆعبەتەی
هەموو جار من دەڵێم
دەعوەتی تۆم و
تۆش دەڵێی
( تا پیاو وەستابێت عەیبە ئافرەت پارە بدات ) ..
…
وەرە با بەدرۆی (خەوی ناخۆشم پێتەوە بینیوە )
نامە بۆیەکتر بنێرین
تەلەفۆن بۆ یەکتر بکەین
گوێ لە دەنگ و هەناسەی یەک بگرین
تێر قسە بکەین و ئینجا
تێر بگرین ..
…
با لە هاوڕێ نزیکەکانمان هەواڵی یەکتر بپرسین
تا هەواڵپرسینەکە بەیەکتر بگاتەوە
خەمخۆریمان پشتڕاست بکاتەوە .
…
ڕەنگە ( سلاوێک )
ببێتە مەڵهەمی سەر بڕینی دڵ
( داوای لێبوردن )ێک ببێتە شیفا
(بیرت دەکەم ) ێک دەرگای زویر بوون بشکێنێ
ئاشتبوونەوە، وەک باڵندەی ناو قەفەس بدات لەشەقەی باڵ
…
وەرە با کۆتایی بەو گۆرانیە غەمگینەی غولامی بهێنین
کە عەیامێکە بوەتە وێردی سەر زمان
ئەو گۆرانیەی دەڵێ :
(نەمردم من ئەگەر ئەمجارە بێ تۆ
نەچم شەرتە هەتا ئەو خوارە بێ تۆ
دەرونم خاڵیە وەک نەی دەناڵێ
هەوارێکی چ پڕ هاوارە بێ تۆ )
…
ئەگەر تۆ بێیتەوە
نە هەتا ئەو خوارە دەچم بێ تۆ
نە دەروون خاڵی دەبێت و
وەک نەی بناڵێ
نە هەواریش پڕ هاوار دەبێت بێ تۆ ..