ئەحمەد شاملوو
وه‌رگێڕانی: ساماڵ ئه‌حمه‌دی
خۆش کشاویتە سەربانان
بەفرە نوێیەکە سڵاو!
پاکیت هێنا هیوای سپی!
ئێستا هەر پیسییە باو
…
هەوایەکی شووم دەژەنێ
ژەنیارەکەی زەمانە
هەر تاڵاوی ژینە دەتکێ
لە لێواری پەیمانە
…
شێوەفرمێسکێک ڕادەخوشێ
کە پێی دەبێژن بزە
پەیکەری ناوێک دەتاشێ
شێوەی لە شێوەی گزە
…
شەممە هەینی و پار هەر پێرار
وای کێشاون شێوەکار
مەلی شادی هاتە سەر داو
کە داو پسابوو جەخار!
…
ڕێ گەییە دەشتایی، بەڵام
هەنگاو هەر لەدوو نایە
ئاگر دەنگی پڕ لە ئاوە و
تینوو لە گیانەڵڵایە
…
ئەو کاتە دەگەینە ئاوات
کە ئاوات ببڕێ تەواو
خۆ ئەوەش خاوخەیاڵییە
بەفرە نوێیەکە سڵاو!