رێبوار قه‌ره‌حه‌سه‌نی
له‌به‌ر بیزاری، به‌م ئێواره‌یه
ده‌ستی شه‌قام و،رێی نامۆ ده‌گرم
به‌ژێر ره‌هێڵه‌ی، باران و به‌فرا
ده‌چم له ژووانی،جارانا ده‌مرم
***
له‌گه‌ڵ یادگارێك، سه‌ر دەنێمه‌وه
له‌ژێر دره‌ختی، ڕەنگ زەردی پایز
سه‌ربرده‌ی عیشقم، ده‌خوێنمه‌وه
بۆ په‌پووله‌یه، سه‌رمابردووی زیز
***
هه‌ردوو پێكه‌وه، له‌سای پایزدا
سه‌ر ده‌خه‌ینه سه‌ر، گه‌ڵای هه‌ڵوه‌ریو
به‌ده‌م هه‌نسكی، یادگاره‌وه
تا ڕووحمان ده‌بێ، به‌خونچه‌ی ته‌زیو
***
ئاسمان هه‌ورێكه، وه‌كو خه‌می دڵ
نمه‌ی بارانیش، ئه‌سرینی گه‌شمه
ته‌رمی ئه‌م عیشقه، له‌كوێ بنێژم
وه‌ك كۆرپه‌ی ئازیز، هه‌ر له‌باوه‌شمه