پارێزگاری دهۆک: ژمارەیەک کاندید سزا دراون

پارێزگاری دهۆک ڕایگەیاند، ژمارەیەک کاندید بەهۆی “پێشێلکردنی ڕێنماییەکانی کۆمیسیۆن” لە کاتی بانگەشەی هەڵبژاردنی پەرلەمانی کوردستان، سزا دراون.

یەکشەممە، 29-09-2024، د. عەلی تەتەر، پارێزگاری دهۆک لە کۆنفرانسێکی ڕۆژنامەوانیدا ڕایگەیاند “ژمارەیەک کاندید لەلایەن لقی دهۆکی کۆمیسیۆنی هەڵبژاردنەکانی عێراقەوە پێ بژاردنیان پێ کراوە و سزادراون، لەبەر ئەوەی بە شێوەیەکی نایاسایی پۆستەرەکانی بانگەشەیان لەسەر شەقامەکان دانابوو و ڕێگەی هاتوچۆی هاووڵاتییانیان گرتبوو”.

پارێزگاری دهۆک باسی لەوەش کرد “لیژنەیەکی تایبەت بە هەماهەنگی لەگەڵ لقی دهۆکی کۆمیسیۆنی هەڵبژادنەکانی عێراق، بە مەبەستی بەدواداچوون بۆ کەوتن، دڕاندن و شێواندنی پۆستەری کاندیدان لە سنووری پارێزگاکە پێک هێندراوە و سەرپێچیکاران هەر کێ بن، بە سزای خۆیان دەگەن”.

وەکوو ئەوەی د. عەلی تەتەر ئاماژەی پێ کرد “وەکوو حکوومەت، ئیدارەی پارێزگای دهۆک و لیژنەی ئەمنیی سەرپەرشتیی پرۆسەی هەڵبژاردن لە سنووری پارێزگای دهۆک، داوا دەکەین بانگەشە بە شێوەیەکی مەدەنی، شارستانی، دیموکراسییانە، ئارام و دوور لە پێشێلکاری و ناوزڕاندن بەڕێوە بچێت. پێمان وایە سەرکەوتنی سەرەکی و گەورە، سەرکەوتنی پرۆسەی هەڵبژاردنە، نەک کە هەر لایەنێک چەند کورسی بە دەست دەهێنێت”.

بە بڕیاری کۆمیسیۆنی باڵای سەربەخۆی هەڵبژاردنەکانی عێراق، لە بەیانیی چوارشەممەوە، 25-09-2024، بانگەشەی هەڵبژاردنی خولی شەشەمی پەرلەمانی کوردستان دەستی پێ کردووە و تاوەکوو 15-10-2024 بەردەوام دەبێت.

دەنگدانی گشتیی خولی شەشەمی پەرلەمانی کوردستان ڕۆژی 20-10-2024 و دەنگدانی تایبەتی پێشمەرگە و هێزە ئەمنییەکانی دیکەش؛ ڕۆژی 18-10-2024 بەڕێوە دەچێت. 136 لیست و 1,191 کاندیدی لایەنەکان و سەربەخۆ و کۆتاکان ڕکابەریى بۆ بەدەستهێنانى 100 کورسیی پەرلەمان دەکەن.

دابەشکاریی ژمارەی کورسییە گشتییەکانی پەرلەمانی کوردستان بەسەر پارێزگاکاندا:

1.  هەولێر: 32 کورسی

2.  سلێمانی: 36 کورسی

3.  دهۆک: 24 کورسی

4.  هەڵەبجە: سێ کورسی

(کۆی گشتی: 95 کورسی)

دابەشکاریی ژمارەی کورسیی کۆتای پەرلەمانی کوردستان بەسەر پارێزگاکاندا:

1.  هەولێر: دوو کورسی

2.  سلێمانی: دوو کورسی

3.  دهۆک: یەک کورسی

4.  هەڵەبجە: سفر کورسی

(کۆی گشتی: 5 کورسی)