هه‌نار موفتی
شه‌وگار ده‌گوزه‌رێ و …
پێڵووی چاوه‌كانم
بۆ ساتێكیش نانوون!
خه‌یاڵه‌كانم ئاڵۆز
دایكم به دسته بێ هێزولاوازه‌كانی
خه‌مه‌كانم بۆ ئاوڕشێن ده‌كا
تا كڵپه‌و گڕی ناخم خامۆش كا.
باوكم رۆژانه رۆحیانه‌تی دێته‌وه!
تا له‌سه‌ر له‌پی كاغه‌زو…
قه‌ڵه‌مه‌كه‌ی ده‌ستی
جارێكی تر ژیان بنووسێته‌وه!
ئه‌و شیعرو وشه‌كانی،
ئه‌كا به گه‌ردانه‌و…
به ملی ته‌نیاییدا هه‌ڵیان ئه‌واسێ
ئا.. ئه‌و
به‌دوای ئه‌ڤیندا ئه‌گه‌ڕێ!؟
چوون ئه‌و ئه‌زانێ
ئه‌ڤین و ژیان ده‌مێكه مردوون و
ئێوه خۆش!؟
ئه‌ردوانه‌كانی موحیبه‌ت
بوون به ره‌شه‌با
شووشه‌ی په‌نجه‌ره‌كانی شكاندو
ده‌رگاكانی دا به‌یه‌كا
گه‌ڵا و شكۆفه‌ی؛
دره‌خته‌كانی هه‌ڵوه‌راندو…
گوڵی نێوئینجانه‌كانی؛
خۆشه‌ویستی وشك كرد!
بۆیه ئه‌بێ ئیتر منیش
به زمانی ره‌شه‌با بدوێم و..
به رێچكه رێی هه‌وره برووسكه‌دا چه‌خماخه
بده‌م و بڕۆم
جا ئه‌وكات…
ده‌ست ئه‌خه‌مه قژی هه‌وره‌كان و…
به‌شه‌سته بارانی ئه‌وین
خۆم مه‌ست مه‌ست ئه‌كه‌م و…
نم. نم ئه‌ڕژێمه
نێو گه‌رووی وشكی زه‌وی و…
تینوێتی ژیان و سروشت ئه‌شكێنم!
3/1/2020