ناوی یەکەمەکانی زانکۆ و پەیمانگەکان بۆ دامەزراندن ئاراستەی وەزارەتی دارایی کرا

وەزارەتی خوێندنی باڵا و توێژینەوەی زانستی، ناوی یەکەمەکانی زانکۆ و پەیمانگەکانی بۆ دامەزراندن، ئاراستەی وەزارەتی دارایی و ئابووری کرد.

بە ئیمزای د. ئارام محەممەد قادر، وەزیری خوێندنی باڵا و توێژینەوەی زانستی، ناوی سێ یەکەمەکان، بە نووسراوێکی فەرمی، بە مەبەستی دامەزراندن ئاراستەی وەزارەتی دارایی و ئابووری کرا.
لە نووسراوێکی فەرمیدا، بە ژمارە (١٥٩٢٥) لە ڕێکەوتی (٢٠٢٤/٨/٢٢)، ناوی دەرچووە یەکەمەکانی زانکۆ و پەیمانگەکان ئاراستەی وەزارەتی دارایی و ئابووری/ بەڕێوەبەرایەتیی گشتیی بودجە/ بەڕێوەبەرایەتیی میلاکات کراوە.
تێیدا هاتووە: سەبارەت بە دامەزراندنی سێ یەکەمەکانی سەر ئاستی بەش لە کۆلێژ و پەیمانگەکان، بە مەبەستی دامەزراندنی هەمیشەییان بۆ سەر میلاکی وەزارەتی خوێندنی باڵا و توێژینەوەی زانستی، دوای ئەنجامدانی بایۆمەتری، ناوی سەرجەم دەرچووانی سێ یەکەمەکانی سەر ئاستی بەشەکانتان بۆ دەنێرین، بە مەبەستی ناردنیان بۆ وەزارەتی دارایی حکومەتی عێراقی فیدرال، بۆ تەرخانکردنی شایستەی دارایی بۆیان.