تۆمەتبار بە کیلۆیەک ماددەی هۆشبەرەوە دەستگیر کران
بەڕێوەبەرایەتی نەهێشتنی ماددە هۆشبەرەکان ئاشکرای دەکات، 6 تۆمەتبار بە کیلۆیەک ماددەی هۆشبەری جۆری کریستاڵەوە لە ئۆپەراسیۆنێکدا دەستگیر کران.
سێشەممە 30ـی تەممووزی 2024، بەڕێوەبەرایەتی نەهێشتنی ماددە هۆشبەرەکان لە ڕاگەیاندراوێکدا ئاشکرای کردووە، لە بەردەوامی هەوڵەکانیان بۆ بەرەنگاربوونەوە و نەهێشتنی ماددە هۆشبەرەکان، دوای بەدواداچوون و کۆکردنەوەی زانیاری و وەرگرتنی فەرمانی دادوەری لێکۆڵینەوەی ئاسایش، لە 29ـی تەممووزی 2024، توانیویانە دەست بەسەر کیلۆیەک ماددەی هۆشبەر لەجۆری کریستاڵدا بگرن.
بەڕێوەبەرایەتی نەهێشتنی ماددە هۆشبەرەکان ڕایدەگەینێت: لەم چاڵاکییەدا کە ماوەی دوو رۆژی خایاند، باندێکی شەش کەسی مەترسیدار کە کاری بڵاوکردنەوەو کڕین و فرۆشتنیان بە ماددەی هۆشبەرەوە دەکرد دەستگیرکران، هەروەها درۆنێکیش کە لەم تاوانکاریەدا بەکار دەهێنرا لەگەڵ چەند پارچە چەک و نارنجۆک و بڕێک دۆلاری ساختەش، دەستی بەسەردا گیرا.
نەهێشتنی ماددە هۆشبەرەکان ئاشکرای کردووە، تەواوی تۆمەتباران لەژێر لێکۆڵینەوەدان و بەپێی یاسای بەرەنگاربوونەوەی ماددەهۆشبەرەکان و کارتێکەرە ئەقڵیەکان ڕووبەڕووی یاسا دەکرێنەوە.