ئه‌مڕۆ یه‌كشه‌ممه 19_5_2024، ئومێد خۆشناو پارێزگاری هه‌ولێر، به ئاماده‌بوونی فه‌رهه‌نگ غه‌فور به‌ڕێوه‌به‌ری گشتیی رۆشنبیری و هونه‌ری پارێزگای هه‌ولێر، پێشوازی له گۆرانبێژ شێرزاد نانه‌كه‌لی كرد، كه له‌ماوه‌ی رابردوودا كلیپێكی گۆرانی به ناونیشانی (شاری پێكه‌وه ژیان) بڵاوكردووه‌ته‌وه، تێیدا هه‌ولێری به هێما و ناونیشانی پێكه‌وه ژیان وه‌سفكردووه.
له دیداره‌كه‌دا پارێزگاری هه‌ولێر به‌خێرهاتنی هونه‌رمه‌ند شێرزاد نانه‌كه‌لی كرد و ده‌ستخۆشی بڵاوكردنه‌وه‌ی كلیپی نوێیه‌كه‌ی لێكرد و هیوای سه‌ركه‌وتنی بۆ خوست.
ئه‌وه‌شی رایگه‌یاند، كه‌وا هه‌زاران ساڵه شاری هه‌ولێر هێما و ناونیشانی پێكه‌وه ژیانی ئایینی و نه‌ته‌وه‌یی بووه. پارێزگاری هه‌ولێر دووپاتیشیكرده‌وه، رێز له كاره‌كانی هونه‌رمه‌ند شێرزاد نانه‌كه‌لی و ته‌واوی هونه‌رمه‌ندانی شاری هه‌ولێر و هه‌رێمی كوردستان ده‌گرن و هه‌میشه پشتگیری له بیرۆكه و كاری ناوازه و نوێ ده‌كه‌ن. گوتیشی پاڵپشتیكردنی ئه‌و به‌رهه‌مه هونه‌رییانه‌ی هۆكارن بۆ پته‌و كردنی پێكه‌وه ژیانی مرۆڤایه‌تی و خاك و نیشتمان و وڵات، به‌رده‌وام ده‌بن.
له‌لایه‌ن خۆیه‌وه شێرزاد نانه‌كه‌لی سوپاسی پارێزگاری هه‌ولێری كرد، بۆ ئه‌و پێشوازییه گه‌رمه لێكرا و رایگه‌یاند، هه‌میشه له رێگه‌ی هونه‌ر و میوزیكه‌وه خۆشه‌ویستی بۆ خاك و نه‌ته‌وه و نیشتمان دووپاتده‌كه‌ینه‌وه، رێز و هه‌ڵوێست و پشتگیری پارێزگاری هه‌ولێر بۆ هونه‌ر و هونه‌رمه‌ندان مایه‌ی خۆشحاڵیمانه.
له‌باره‌ی به‌رهه‌مه نوێكه‌ی به‌ناوی (شاری پێكه‌وه ژیان) شێرزاد نانه‌كه‌لی رایگه‌یاند، هه‌ولێر هه‌میشه شاری ئاشتی و پێكه‌وه ژیان بووه بۆ ته‌واوی پێكهاته‌كانی كوردستان و گوتی: له رێگه‌ی ئه‌و به‌رهه‌مه‌وه ویستم تابلۆی حه‌قیقی شاری هه‌ولێر نیشان بده‌م، كه دوای هه‌زاران ساڵ به‌رده‌وامه له پاراستنی نه‌ریت و كولتووری به یه‌‌كه‌وه ژیانی ئایینی و نه‌ته‌وه‌یی.
دواجار ئومێد خۆشناو پارێزگاری هه‌ولێر قه‌ڵغانی رێزلێنانی پێشكه‌ش به هونه‌رمه‌ند شێرزاد نانه‌كه‌لی كرد، هیوای سه‌ركه‌وتن و كاری ناوازه‌تری بۆ خواست.
به‌هۆی بڵاوكردنه‌وه‌ی كلیپی (شاری به‌یه‌كه‌وه ژیان) پارێزگاری هه‌ولێر رێزی له هونه‌رمه‌ند شێرزاد نانه‌كه‌لی نا
