بەڕێوەبەری گشتی بانکە بازرگانییەکان ئاماژەی بۆ ئەوەکرد، ڕۆژانی داھاتوو پرۆسەی ھەژماری من لە پارێزگای دھۆک بەڕێوەدەچێت و دەشڵێ: لە پارێزگای سلێمانیش دەستپێکراوە و بڕیارە لەماوەی شەش مانگدا تەواو بکرێت.
مەولود سابیر، بەڕێوەبەری گشتی بانکە بازرگانییەکان بە ماڵپەڕی فەرمیی پارتی دیموکراتی کوردستانی ڕاگەیاند: پرۆسەی ھەژماری من بۆ فەرمانبەران لە پارێزگا ھەولێر تەواو بووە و ئێستا چوار ھەزار فەرمانبەر بە ماستەر کارت مووچەکانیان وەر دەگرن، لە سلێمانیش ڕۆژانی ڕابردوو بە ئامادەبوونی نووسینگەی سەرۆکی حکوومەتی ھەرێمی کوردستان و وەزیری دارایی و ئابووری پرۆسەکە دەستپێکراوە و بڕیارە لە شەش مانگدا تەواو ببێت.
بەڕێوەبەری گشتی بانکە بازرگانییەکان گوتی: لە ڕۆژانی داھاتووش لە سنووری پارێزگای دھۆک دەست بە پرۆسەی ھەژماری من دەکرێت و پێشبینی دەکەین تا کۆتایی ئەمساڵ پرۆسەکە کۆتایی بێت و ھەموو فەرمانبەرانی ھەرێمی کوردستان بە سیستمی بانک مووچە وەر بگرن، چونکە تیمەکان بەردەوام لەکاردان بۆ ئەوەی پەلە بکرێت لە دروستکردنی ھەژماری من بۆ فەرمانبەران.