هاودەنگ فارووق
گەلانی ئێران و ناوچەكە زۆر باش دەزانن، كە هەولێر بەدرێژایی هەبوونی لە كایەی سیاسەتی هەرێمایەتیدا، پایتەختی شكۆمەندی و ئاشتی و پێكەوەژیان بووە، لەساتەوەختی دروستبوونی قەوارەی هەرێمی كوردستانەوە تاكو ئەمڕۆ، هەرگیز مایەی هەڕەشە نەبووە بۆ سەر تاران، بگرە لەخراپترین دۆخی سیاسی و ئابووریی ئێراندا، هەرێمی كوردستان بووەتە كۆریدۆرێكی ئەمین و گرنگ و پڕبایەخ بۆ كاڵا و شتومەكی ئێرانی، شاڕەگی ئاڵوگۆڕی بازرگانی.. پەیوەندییەكان هەرگیز وابەستە نەبوون بەو گرژییانەوە كە ڕوویان لەئێران كردووە، لێ مخابن وەڵامی ئێران هێرش و فیتنە و ئاژاوەگێڕیی و دەستێوەردان بووە لە كاروباری ناوخۆی كوردستان، ئێستا حقدەكە گەیشتۆتە هێرشی دوژمنكارانە.
هەرێمی كوردستان لەمامەڵە لەگەڵ ئێراندا، ئەوەندەی ڕەچاوی قووڵایی ستراتیژی و بەرژەوەندیی هاوبەش و هاوسێیەتی باش و پەیوەندیی مێژوویی كردووە، هەرگیز بە ڕوانگەی ئەمنی و دوژمنكارییەوە چاو لە ئێران و وڵاتانی دیكەی دراوسێ ناكات، حكوومەتی كوردستان، ڕەچاوی ئەوەی نەكردووە كە ئێران لەچ دۆخێكی خراپی نێودەوڵەتیی و گەمارۆی ئابووری دۆخی نابوت و نالەباردایە، بەڵكوو هەر بەچاوی دراوسێیەتی ئیجابی و پەیوەندی مێژووی هاوسەنگ لەگەڵ ئێراندا بەرخوردی كردووە، لەوەشدا هەمووان سوودمەندبوون.
بۆیە بەئامانجگرتنی چەند جارەی هەولێر، لەلایەن سوپای پاسداران و وەكیلەكانیان لە عێراق، نەك هیچ ڕەوایەتییەكی نییە، بەڵكوو خودی دیپلۆماسیەتی ئێرانی و سوپا و هەواڵگرییەكەی بەجۆرێك ئیحراج و نابەڵەد و كۆڵەوار كردووە كە ناچارن وێنەی شەهیدی دەستی غەدری كۆماری ئیسلامی، نەمر پێشڕەو دزەیی، بە فۆتۆشۆپ ساختە بكات، تاكو خۆی لەو ئیحراجیی و كردەوە تیرۆریستییە دەرباز بكات.
بۆ دیپلۆماسیەتی ئێران باشتر بوو، بەفەرمی داوای لێبووردن لە گەل و سەركردایەتیی سیاسی كوردستان بكات، ئایە وەها باشتر نەبوو، بۆ داپۆشینی ئەو كەتنەگەورەیەی كردی، بێت كێشەكانی لەگەڵ كورد و دراوسێكانی دیكەی سفر بكاتەوە، نەك ئەوەی ناچاربێت بە فۆتۆشۆپ وێنەی شەهیدەكانمان ساختە بكات؟
ئێستا پرسیاری ئێمە و هەر مرۆڤێكی هۆشمەند و ژیر لەئێران و لەبڕیاردەرانی هێرشەكان ئەمەیە: بۆچی ئێران بەزۆری زۆرداری دەیەوێت، دوژمنێكی وەهمی بۆ خۆی لەسەر جوگرافیای هەرێمی كوردستان وێنا بكات؟ لەكاتێكدا دەستی كورد بۆ ئاشتی و ڕێزی هاوبەش ئاوەڵابووە، دەستەڵاتدارانی ئێران بۆچی بە موشەك وەڵام دەدەنەوە؟ بۆچی وەك دوو نەتەوەی دۆست و دراوسێی باش پێكەوە نەژین؟
مادەم ئێران وەك هەر دەوڵەتێكی دی، هەوڵ بۆ دابینكردنی بەرژەوەندییەكانی خۆی دەدات، بۆچی حكوومەتی كوردستانیش لێی حەرامە لە خەمی بەرژەوەندیی میللەتی خۆیدا بێت؟
دەبێت لەخۆیان بپرسن: ئایا بەرژەوەندیی ئێران لەوەدایە نەتەوەیەكی گەورە وەك دوژمن سەیر بكەن و وەك دوژمن مامەڵەی لەگەڵدا بكەن، تەنها لەبەر ئەوەی كورد بێ دەوڵەتە، ئیدی دەبێ ئەوان هەر تاوناتاوێك هاژەكی دوژمنكارانەی بەسەردا ببارێنن، خوێنی خەڵكی بێتاوان بڕێژن؟
ئاخر كامە بەرژەوەندی بەم شێوەیە مسۆگەر دەركرێت؟.
ئاقڵمەندان و هۆشمەندانی ئێرانی، لەم دۆخەدا زیاتر لەهەر كاتێكی دی لەبەردەم حوكمی مێژوودان و، دەبێ ڕێگە نەدەن تەنها لەبەر ئەوەی هێزی سەربازی كورد و ئەوان هاوسەنگ نییە، دژایەتی بكرێت و، وەك دوژمن مامەڵەی لەگەڵدا بكرێت. ئاخر كورد ئەگەر هیچی نەبێ، ئیڕادەی بەرز و هێزی گیانفیدای هەیە، ئەوەیە جیاوازیی نێوانمان، ئێوە درۆن و هاژەكی بالیستی، كوردیش ئیڕادەی بڵند و خۆڕاگریی و خۆنەچەماندن.