دواى ئەوەى لە مانگى ئادارى ئەمساڵ لە کاتى سەردانى سەرۆکوەزیرانی عێراق بۆ هەولێرى پایتەخت، پارێزگارى هەولێر، پڕۆژە پلانێکى بۆ رووبەڕووبوونەوەی گۆڕانكارییەكانی كەشوهەوا و بابەتی لافاو و دابینكردنی ئاو، بە گوژمەی (14 ملیار دینار) ئاراستەی سەرۆکوەزیرانی عێراق کرد، کە چەندین پڕۆژەى جۆرا و جۆرى تایبەت بە چارەسەرکردنى گرفتی کەم ئاوی و مەترسیەکانی لافا و کاریگەرییەکانی گۆڕانی کەش و هەوا لە خۆگرتبوو.
سەبارەت بە هەمان پرس ڕۆژى 2023.11.13 لە بەغدا بەسەرۆکایەتى سەرۆکوەزیرانی عێراق چوارەمین کۆبوونەوەى لیژنەی باڵای نیشتمانی ئاو بە بەشدارى شاندى هەرێمى کوردستان بەڕێوەچوو، کە تەوەرێکى کۆبوونەوەکە تایبەت بوو بە خستنە ڕووى پڕؤژەکەى هەولێر، لە کۆبوونەوەکەدا پارێزگارى هەولێر پوختەیەکى لەو پڕۆژانە و کاریگەرییەکانی گۆرانکاری کەشوهەوا و ئەو پلان و ڕێگا چارەسەریانەى هەن لە چوارچێوەى ئەم پڕۆژانەى ئاراستەی سەرۆکوەزیرانی عێراق کرابوو خستەڕوو، جەختى لەسەر هەموو ئەو بابەتانەش کردەوە کە لەسەر دۆخی هەولێر و کاریگەرییەکانی کەشوهەوا و لێکەوتە و مەترسیەکانی کەمى ئاو ڕووبەڕووى هەولێر بۆتەوە، بەخۆشحاڵیەوە لیژنەى ناوبراو بەکۆى دەنگ پڕۆژەکەى هەولێریان پەسندکرد و ئاڕاستەى ئەنجومەنى وەزیرانى حکومەتى عێراقیان کرد بۆ دەستکردن بە ڕێکارى دیکە.
پاشان لەهەمان ڕۆژدا پارێزگاری هەولێر، لە دیوانی ئەنجومەنی وەزیران، لە دیدارێکدا لەگەڵ مەحەمەد شەیاع سودانى، سەرۆکوەزیرانی عێراقی فیدراڵ، وێڕاى جەختکردنەوە لەسەر ئەوپڕۆژانە، سڵاو و ڕێزى ڕێزدار مەسرور بارزانى، سەرۆکوەزیرانى حکومەتى هەرێمى کوردستانی بە بەڕێزیان گەیاند و پشتگیرى جەنابیانى بۆ زەرورەتى جێبەجێکردنی پڕۆژەکان ڕاگەیاند، لە 2023.11.21، ئەنجومەنى وەزیرانى عێراق بە نووسراوى ژمارە (56997) کە ئاڕاستەى وەزارەتى دارایی حکومەتى عێراق کراوە، ڕەزامەندیدا لە سەر تەرخانکردنى بودجەى پێویست بە خەرجکردنى (14 ملیار دینار) لەسەر بودجەى فریاکەوتنى عێراق بۆ هەولێر بۆ دەستکردن و جێبەجێکردنى پڕۆژەکان، بەجێبەجێبوونى ئەو پڕۆژانە کە تایبەتە بە لێدانی ژمارەیک بیری تازە، دروستکردنى ژمارەیەک پۆند و چاککردنەوە و نۆژەنکردنەوەى پڕۆژەکانی ئاو، بەشێکى دیکە لە پلانەکانى ڕووبەڕووبوونەوەى گۆڕانکارییەکانى کەش و هەوا لە پارێزگاى هەولێر جێبەجێ دەکات.
پارێزگاى هەولێر
2023.11.24