لەشەڕی غەزەدا، حیزبی كوردی نەگەییە بوار، قولی هەڵكرد

مەشخەڵ كەوڵۆسی

ئێمە سەری زمان و بنی زمانمان توێژینەوەیە، یانی پێویستە بەر لەهەر هەنگاوێك، پێش هەموو بڕیارێك، بەتایبەتی بڕیاری حیزب و حكومەت، توێژینەوە ئەنجام بدرێت، سیناریۆكانی جێبەجێكردن و ئەنجامە چاوەڕوانكراوەكان ڕوون بن و لەبەرچاو دابنرێن و ئۆپشنەكانی گۆڕینی سیناریۆكان، خراپترین ئەگەرەكان تاكو باشترین شیمانەكان، تەواو تەواو ڕوون بن و، لەبەرچاوبن، ئەوجا بڕیارەكان رابگەیەنرێن.
ئەوە نەریتی دروستكردنی بڕیار و ڕوئیای هەر دەزگایەكی كۆمەڵگەی مۆدێرنە لەجیهاندا، لە كۆمپانیایەكی بچوكەوە، تاكو دەگاتە حیزب و حكومەت.. ئەمە لەڕووی تیۆرەوە وایە. بەڵام كاتێ ئەم مەفهومە دێتە ناو بیركردنەوەی كورد، ڕاستەوخۆ بەرهەمدەهێنرێتەوەو، بەگوێرەی میزاج و چوارچێوە فیكریەكەی كورد دەستكاری دەكرێت و مورتروبە دەكرێت بەكۆمەڵێك قەناعەتی پێشوەختە و ئایدۆلۆژی، كە هیچ سەنگێكی زانستییان نیە و، لەڕاستیدا توێژینەوەش لە قاڵبە ئەكادیمی و باوەكەی دەردەكەن و قاڵبێكی بەتانوپۆی تێگەیشتنی میزاجی كوردی بەبەردا دەبڕێت.
ئەوە ئەگەر مانای شتێك بدات، بێگومان مانای ئەوە دەدات كە لەم جیهانە تایبەتەی ئەقڵی كوردیدا، شتێك نیە دەستكاری نەكرێت و بەرهەم نەهێنرێتەوە، هەموو شتێك، هەموو چەمكێك، هەموو مانایەك، دەستكاری دەكرێنەوەو، دووبارە دەخرێنەوە بازاڕ.
جارێكیان گوێم لە عەلی شەمخانی وەزیری پێشووی بەرگری ئێران بوو گوتی: هیچ جەنگێك لەجیهاندا ڕووی نەداوە، لە كوێرە دێیەكەوە تاكو گەورەترین جەنگ لەجیهاندا، كە ئێمە دیراسەی وردمان نەكردبێت، هۆكاری سەركەوتن و شكستی لایەنەكانمان دیاری نەكردبێت و، چۆنێتی سودوەرگرتن لەو ئەزمونەمان دیاری نەكردبێت.
ئەوە تەندروستترین ڕێگەیە بۆ ئەوەی هەر لایەنێك بتوانێت خۆی لەگەڵ ژینگەی جیهانیدا بگونجێنێت و، هەوڵ بدات سود لەئەزمونی ئەوانیتر وەربگرێت. یان خۆی لەمەترسییەكان لا بدات.
كەچی كاتێك حیزبی كوردی دەیەوێت ئەو ڕاستییە بەرجەستە بكات، ناگاتە بوار قولی هەڵدەكات! سەرلەبەری مەسەلەی دیراسە ژێراوژوور دەكات و، لەسكە و قاڵبی خۆی دەریدەكات.
لەم ماوەیەدا شەڕی غەزە هەیە. هیچ گومانی تێدانیە كە دەزگاكانی دیراسات و ناوەندەكانی چاودێری و هەواڵگری و سیاسی و سەربازی و كۆمپانیاكانی بەرهەمهێنانی چەك، حیزبەكانیش دەیانەوێت دیراسەی جەنگەكە بكەن و، پەند و فیدباكی لێوەربگرن. بەڵام هیچ دەزگایەكی ئەكادیمی و كەسایەتییەكی خاوەن سەنگ و هیچ دەوڵەت و حیزبێكی ئەم گێتییە، نابینی پێش كۆتاییهاتنی جەنگەكە بەرئەنجام ڕابگەیەنێت، یاخود بوێری ئەوەی هەبێت فیدباك ڕابگەیەنێت. یان بڵێت: جەنگی غەزە ئەم ئەنجامانەی هەبوو!.
لەم ماوەیەدا سەركردەی حیزبێكی ئیسلامی كوردی، بێباك لە بەهاكان و سنور و یاساكانی دیراسە، بەرلەوەی جەنگی غەزە كۆتاییهاتبێت، دەڵێت: حەوت وانە لە شەڕی غەزەوە.
من لێرەدا تەنها دەپرسم: باشە ئەو جورئەتە لەكوێوە هاتووە؟ هەر بەڕاستی سەیرە و زۆریش سەرسامم بەو ئەتككردنی دیراسەیەو موتروبەكردنی بە كۆمەڵێك خەیاڵاتی ئایدۆلۆژی.
ئایا هیچكام لەو خاڵانە لەو جێگایانەی دیراسە تیایاندا بەهایەكی هەیە، دانیان پێدادەنرێت؟ ئایا ئەوەی فەرمووتان دیراسەیە یان لایە لایە بۆ كۆمەڵێك موریدی ئایدۆلۆژی و جەماعەتی ئەشەو بیلا، كە نەدەزانن بنەماكانی دیراسە چییە و، نە هیچ ئامانجێك لە پشتی گوێگرتنیانەوەیە لەو قسانە جگەلە قەرەباڵغكردنی كۆڕەكانی جەنابت!.
دواجار، ئەم پەلە پەلە لە وەرگرتنی ئەنجامێكی ئایدلۆژی لەجەنگی غەزەو، لەلایەكەوە پرۆسەی دیراسەكردنی لاقە كردووە، لەلایەكی تریشەوە، ئێمەی تێگەیاند كە هیچ سنورێك بۆ خەیاڵاتی حیزبی كوردی و ئەو جەماوەرە فەقیرەش نیە كە گوێی بۆ دەگرن. بەتایبەتی ئەگەر ئایدۆلۆژیای پیرۆز لەپشتییەوە بێت و، هەمووان ناچاربن بڵێن سوبحانەڵا لەو جەنگە هەمووی بە بەرەكەت بۆ موسوڵمانان تەواو بووە، وەك مامۆستا دەفەرموێت.