ئه‌مڕۆ یه‌كشه‌ممه 2023/10/29 به‌ڕێز نێچيرڤان بارزانى، سه‌رۆكى هه‌رێمى كوردستان، له په‌يوه‌ندييه‌كى ته‌له‌فۆنيدا، پرسه و سه‌ره‌خۆشى له خانه‌واده و كهسوكارى نووسه‌ر و میدیاكار و تێکۆشه‌ری دیار خوالێخۆشبوو ناجی ئه‌رگۆشی كرد كه به‌هۆی نه‌خۆشییه‌وه كۆچی دوایی كرد.
سه‌رۆك نێچیرڤان بارزانی هاوسۆزى و هاوخه‌ميى خۆى به كهسوكارى خوالێخۆشبوو ڕاگه‌یاند و خه‌بات و قوربانیدانی خوالێخۆشبوو و خانه‌واده تێكۆشه‌ره‌كه‌ی له شۆڕشه‌كانی ڕزگاریی كوردستاندا به‌رز نرخاند، هه‌روه‌ها هيواى خواست يه‌زدانى مه‌زن گيانى به به‌زه‌يى و ميهره‌بانيى خۆى شاد بكات و ئارامى و دڵنه‌وايى به خانه‌واده و كه‌سوكاری ببه‌خشێت.
لاى خۆيانه‌وه خانه‌واده‌ى خوالێخۆشبوو سوپاس و پێزانينيان بۆ په‌يوه‌نديى و سه‌ره‌خۆشى و هاوخه‌میی به‌ڕێز سه‌رۆكى هه‌رێمى كوردستان له خه‌م و پرسه‌كه‌ياندا ده‌ربڕى.