پاشنیوه‌ڕۆی ئه‌مڕۆ یه‌كشه‌ممه 22/10/2023 له سه‌ردانێكدا بۆ ئیداره‌ی سهربهخۆی سۆران، به‌ڕێز نێچیرڤان بارزانی، سه‌رۆكی هه‌رێمی كوردستان، له‌گه‌ڵ به‌ڕێز هه‌ڵگورد نه‌جیب سه‌رپه‌رشتیاری ئیداره‌ی سهربهخۆی سۆران، دۆخی گشتیی سنووری سۆرانیان تاوتوێ كرد، له‌مباره‌یه‌وه به‌ڕێز سه‌رپه‌رشتیاری ئیداره‌ی سهربهخۆی سۆران، پوخته‌یه‌كی ده‌رباره‌ی كار و پرۆژه‌كانی سنووری ناوچه‌كه له هه‌موو بواره‌كاندا خسته‌ڕوو.
نێچیرڤان بارزانی وێڕای ده‌ستخۆشی له‌و كار و خزمه‌ته‌ی له سنووری ناوچه‌كه‌دا كراوه و ده‌کرێت، جه‌ختی له گرنگیی بایه‌خدان به پرۆژه‌كانی ژێرخان به‌گشتی كرده‌وه و به پێویستی زانی بایه‌خی تایبه‌ت به بواری گه‌شتیاری بدرێت و ده‌رفه‌تی وه‌به‌رهێنان بۆ كه‌رتی تایبه‌ت له ناوچه‌كه‌دا بڕه‌خسێت بۆ ئه‌وه‌ی بتوانن به‌شدارییه‌كی كارا له بره‌ودان به كه‌رتی گه‌شتیاری و كه‌رته‌كانی دیکه‌دا بكه‌ن.
له كۆبوونه‌وه‌كه‌دا كه به‌ڕێزان قایمه‌قامه‌كانی سنووری ئیداره‌ی سهربهخۆی سۆران ئاماده‌ی بوون، باس له دۆخی سنووره‌كان و پێداویستییه‌كانی ناوچه‌كه به‌گشتی كرا.