ئەژین عەبدوڵا – هه‌ولێر
وەزارەتی تەندروستیی هەرێمی كوردستان بە مەبەستی ڕێكخستنی خزمەتگوزاریی (گواستنەوەی نەخۆش) بۆ نەخۆشخانە تایبەتەكان لە لایەن كۆمپانیاكانی خزمەتگوزاری گواستنەوەی نەخۆش بە ئۆتۆمبێلی فریاكەوتن لە ناوەوە و دەرەوەی شاری ڕاگەیاند.
بە گوێرەی بڕیارەكەی وەزارەتی تەندروستی دیاریكردنی نرخی گواستنەوەی نەخۆش بە پێی ئەو بڕانە دەبێت كە دیارییان كردووە و جەختیش دەكاتەوە كە پێویستە كۆمپانیاكانی خزمەتگوزاریی گواستنەوەی نەخۆش یان هەر لایەنێك كە مۆڵەتی گواستنەوەی نەخۆشی پێ دراوە پابەند بن بە نرخی پەسندکراوەوە.
وەزارەتی تەندروستی ئەوەشی ڕاگەیاندووە لە كاتی نەپابەندی بە نرخەوە، لایەنی سەرپێچیكار بە پێی یاسا و ڕێنماییە بەركارەكان ڕێكاری یاساییی بەرامبەر دەگیرێتە بەر.
د. سەرکار سوورچی، گوتەبێژی وەزارەتی تەندروستیی هەرێمی کوردستان، ڕوونی كردەوە: ڕێكخستنی نرخەكان بە مەبەستی ڕێگرییە لە قۆرخکاری، هەربۆیە بە پێی ڕێنماییەكی وەزارەتی تەندروستی ڕێگە دەگیرێت لە قۆستنەوە و قۆرخكاری لە نرخی گواستنەوەی نەخۆش لە لایەن ئۆتۆمبێلەكانی فریاكەوتنی كەرتی تایبەت (ئەمبۆڵانسی ئەهلی) و بۆ كەمكردنەوەی بارگرانی لەسەر شانی هاووڵاتییان، نرخ كەم كراوەتەوە و یەك خراوە.
گوتەبێژی وەزارەتی تەندروستی جەختیش دەكاتەوە كە گواستنەوەی نەخۆش بە ئۆتۆمبێلەكانی فریاكەوتن لە لایەن تیمەكانی وەزارەتیانەوە بە شەو و بە ڕۆژ و لە هەموو هەفتەدا بێبەرانبەرە.”
بە گوێرەی بڕیارەكەی وەزارەتی تەندروستی نرخەكان بەم شێوازەیە:
- گواستنەوەی نەخۆش لە ناو سنوری سەنتەرەكانی پارێزگا 25.000 هەزار دینار.
- گواستنەوەی نەخۆش لە سنووری دەوروبەری پارێزگا 50.000 هەزار دینار.
- گواستنەوەی نەخۆش لە دەرەوەی شار (قەزا و ناحییەكان) 1500 دینار بۆ هەر كیلۆمەترێك.
هاوكات ئەگەرهاتو لەگەڵ گواستنەوەكەدا پزیشكی لەگەڵ بێت بەم شێوەیە دەبێت:
*هەبوونی پزیشكی خولاو + پزیشكی شارەزای گشتی لە سنووری سەنتەری پارێزگا 40.000 دینار.
*هەبوونی پزیشكی خولاو + پزیشكی شارەزا لە سنووری دەورووبەری پارێزگا 50.000 دینار.
*هەبوونی پزیشكی خولاو + پزیشكی شارەزای گشتی بۆ دەرەوەی شار (قەزا و ناحییەكان) 75.000 دینار. - هەبوونی پزیشكی پسپۆڕ لە سنووری سەنتەری پارێزگا 70.000 دینار.
- هەبوونی پزیشكی پسپۆڕ لە سنووری دەوروبەری پارێزگا 100.000 دینار.
*هەبوونی پزیشكی پسپۆڕ بۆ دەوروبەری شار (قەزا و ناحیە) 150.000دینار.
*هەبوونی ئامێری هەناسەی دەستكرد لەگەڵ تیمی سڕكار لە سنووری سەنتەری پارێزگا و سنووری دەوروبەری پارێزگا 25.000 دینار.
*هەبوونی ئامێری هەناسەی دەستكرد لەگەڵ تیمی سڕكار دەرەوەی شار (قەزاو ناحییەكان) 50.000 دینار.