دوێنێ، چوارەمین پێشانگەی نێودەوڵەتی خانووبەرە لە هەولێر کرایەوە. پێشانگەکە بۆ ماوەی چوار ڕۆژ بەردەوام دەبێت. 250 کۆمپانیا لە 15 وڵاتی جیاواز تێیدا بەشدارن و سەرووی 120 پڕۆژەی خانووبەرە لە پێشانگەکەدا بۆ هاووڵاتی و بازرگانان دەخرێنە ڕوو.
لە ڕیوڕەسمی کردنەوەی پێشانگەکەدا، د.محەمەد شوکری، سەرۆکی دەستەی وەبەرهێنان لە هەرێمی کوردستان، ڕایگەیاند: بەرەوپێشچوونی کەرتی نیشتەجێبوون لەنێو پرۆسەی وەبەرهێنان، یارمەتیدەر بووە بۆ بەرەوەپێشبردن و گۆڕان لە چەند کەرتی دیکەی وەبەرهێنان لە هەرێمی کوردستان.
سەرۆکی دەستەی وەبەرهێنان، ئاماژەی بەوە کرد، وەبەرهێنانی خانووبەرە لە هەرێمی کوردستان لە چەند ساڵی ڕابردوودا و لە سەرەتای دروستبوونی دەستەی وەبەرهێنان تاوەکو ئەمڕۆ، پێشکەوتنێکی زۆر باشی بەخۆیەوە بینیوە. گۆڕانی بەرچاو لە کەرتی وەبەرهێنانی نیشتەجێبوون لە هەرێمی کوردستان دیارە و سیمای شارەکان گۆڕاوە.
ئەوەشی خستەڕوو، ئەمڕۆ ئێمە وەکو هەرێمی کوردستان لە زۆر ڕووەوە دەتوانین پشت بە خۆمان ببەستین، بەتایبەت لە بوای بیناسازیدا.گوتیشی: ئێستا ئێمە لە هەرێمی کوردستان چەندین کارگەی بەرهەمێنانی شیشمان هەیە، پێداویستی ناوخۆ پڕدەکەنەوە و دەتوانین بە کوالیتیی زۆر باش هەناردەی عێراق و وڵاتانی ناوچەکەش بکەین. لە بواری چیمەنتۆشدا بەهەمان شێوە چەندین کارگەمان هەن و دەتوانین ئەویش بە کوالیتییەکی زۆر باش هەناردە بکەین.
سەرۆکی دەستەی وەبەرهێنان لە وتەکانیدا ئەوەشی خستەڕوو، زۆربەی ئەو کەرەستانەی لە بواری بیناسازیدا لە هەرێمی کوردستان بەکاردەهێندرێن بەرهەمی کارگە نێوخۆییەکانن و هەوڵی دروستکردنی کارگەی زیاتر دەکەین، بۆ ئەوەی لە داهاتوودا هیچ کەرەستەیەکی بیناسازی لە دەرەوە هاوردە نەکرێت.