هاودەنگ فارووق
ئێســـتا ئیتر كاتی هەق و حســـاب و وەستاندنی ئەو كەســـانەیە کە تا دوێنێ شین و شـــەپۆڕیان بۆ هەریسەکەی بەغدا دەکرد. ئیدی كاتی ئەوەیە لێیان بپرسین: فەرموون ئەوەی داواتان دەکرد جێبەجێكرا، بەڵام كوا هێلكەی دوو زەردێنەی كەڵەشـــێرەكەی بەغدا؟
لەپێناوی چیدا ئێوە بووبوونە كەواســـووری بەرلەشكری داگیركەران؟ ئاخر لەپێناوی چـــی درێغیتان لە شـــەڕی دەروونی دژی خەڵكی كوردســـتان نەكـــرد؟ بۆ کێ و بە چ ئامانجێک ئەوەی لە دەســـتتان هـــات کردتان تەنها بۆ ئـــەوەی لەپێگەی هەرێمی كوردستان بدەن و ڕووی ڕەشی سەد ساڵەی داگیركەران سپی بكەنەوە؟
لـــەم قۆناغەدا ئەوەی پێویســـتە بەهەنـــد وەربگیرێت، ئەوەیە ئاسایشـــی نەتەوەیی كوردســـتان پێویستی بەوەیە بەشێوەیەكی ستاندارد و ڕێكوپێك بنووسرێتەوە و وەك پرۆژەیاســـا لە خولی داهاتووی پەرلەماندا بڕیاری لەسەر بدرێت، بۆ ئەوەی لەمەبەدوا هیچ كەس و لایەنێك جورئەتی ئەوەی نەبێت بنەماكانی ئەو یاســـایە پێشـــێل بكات و بەنـــاوی خەمخواردنی ژیانی خەڵكەوە، ببێتە محامیی داگیرکەر و هەیبەت و شـــكۆی قەوارەی هەرێمی كوردستان لەکەدار بکات.
لـــە لایەكـــی دیكەوە، پێویســـتە دەزگا میدیایـــی و ڕۆشـــنبیری و پەروەردەییەكان، بەرنامەیان هەبێت بۆ ئەوەی جیاوازییەکانی تابووری پێنجەم و خەمخۆرانی نیشـــتمان بۆ خەڵكی كوردستان ڕوون بكەنەوە. خەڵك هۆشیار بكەنەوە لەسەر ئەوەی هەركەس باسی مافی خەڵكی كرد، مەرج نییە ڕاستگۆبێت، ڕەنگە پۆپۆلیست و موزایدەچی بێت
و بیەوێت بە زمانی شیرین، خەونی هەنگوینی گەلەکەمان ژاراوی بکات.
كارێكی دی كە پێویستە دەزگایەكی تایبەتمەند و خەمخۆری مێژووی ئەم گەلە بیکات، بریتییە لە ئەرشـــیفكردنی هەموو ئـــەو لێدوان و نووســـین و ئەرگۆمێنتانەی كە ئەو كەســـانە لە شەڕی دەروونیی خەڵكی كوردستاندا بەكاریان هێنا، بۆ ئەوەی لانی كەم، نەوەکانی داهاتوو لە مێژووی ئەمڕۆی گەلەکەمان دانەبڕێن و لەم قۆناغەدا كێ سەنگەری دژایەتیی لە خەڵك و حكوومەتی كوردستان گرتبوو؟ ئەوانەی بەناوی (دڵسۆزی)ـەوە شـــەڕێكی دەروونی بێئامانیان دژی خەڵكی كوردســـتان دەكرد و بووبوونە داردەستی دوژمنانی نەتەوەی كورد، کێ بوون؟ لە هەمان کاتیشـــدا بۆ ئەوەی وەک هەمیشـــە، كەسە ناوەرۆک بەتاڵەکان نەبنەوە هەرزەوەکیلی خەباتی گەلەکەمان و هەروا سووک و هاسان بەری ڕەنجی دڵسۆزان و پارێزەرانی خاک و خەڵکی کوردستانەکەمان نەخۆن.