لەم چەند ساڵەی دواییدا پەتای جۆراوجۆر داکەوت، دیارترینیان پەتای كۆرۆنا بوو، هەروەها ناوبەناو گوێبیستی داکەوتنی پەتای دیكە دەبین، كە هەندێك لە پەتاكان پەیوەندییان بە گۆڕانی كەشوهەواوە هەیە و هەندێكیشان پەیوەندیان بە وەرزەوە هەیە.
د. ڕێباز هه‌مزه سارمه‌می پسپۆڕی نەخۆشییەكانی دڵ و هەناو ڕوونی دەكاتەوە كە ئێستاکە په‌تای ڤایرۆسی (جۆراوجۆر) بڵاو بۆته‌وه، ده‌بێت ئاگاداری ئه‌و كه‌سانه بین كه سەخت تووشی ئه‌م نه‌خۆشییه دەبن و له‌وانه‌یه ژیانیان بكه‌وێته مه‌ترسییه‌وه.
د. ڕێباز هه‌مزه سارمه‌می دەربارەی گروپە بەرمەترسییەکان كە پێویستە پارێزگارییان لێ بكرێت و ئاگاداری باری تەندروستییان بن، ڕوونیدەكاتەوە كە:
1- ئه‌وانه‌ی له سه‌ره‌وه‌ی (60) ساڵانەوەن.
2- ئه‌وانه‌ی نه‌خۆشینی درێژخایه‌نیان هه‌یه (شه‌كره، نه‌خۆشینی دڵ، خوێنپەستان، په‌ككه‌وتن یان هه‌وكردنی درێژخایه‌نی سیپەلاک، په‌ككه‌وتی گورچیله، كێشه‌ی جه‌رگ یان ئه‌وانه‌ی شێرپه‌نجه‌گرێیان هه‌یه).
3- ئه‌وانه‌ی به‌رگەی له‌شیان لاوازه، ئه‌وانه‌ی چاره‌سه‌ری شێرپه‌نجه وه‌رده‌گرن، چاره‌سه‌ری كیمیایی، ئه‌وانه‌ی چاره‌سه‌ری كۆرتیزۆن به‌شێوه‌یه‌كی درێژخایه‌ن وه‌رده‌گرن، ئه‌وانه‌ی چاره‌سه‌ری چاندنی گورچیله یان جگه‌ر وه‌رده‌گرن، یان ئه‌وانه‌ی له زکماكه‌وه به‌رگەی له‌شیان جیاوازه.
4- ئه‌وانه‌ی قه‌ڵه‌ون (BMI) زیاتر له 30.
5- ئافره‌تی دووگیان.
6- ئه‌وانه‌ی كه زۆر جگه‌ره ده‌كێشن.