ئاراس جەبار،شارەزای بواری كەشناسی رایگەیاند: وەك پێشتر لەمانگی رابردوودا ئاماژەمان پێكرد لە مانگی ئازار و نیساندا بارانبارین باش ئەبێتەوە و تێكرای رێژەی بارانبارین بۆ سەروو رێژەی ئاسایی بەرزدەبێتەوە، وەك بینیمان لەم مانگەدا سوپاس بۆ خودا بارانێكی باش ناوچەكانمانی گرتەوە كە بەڕاورد بەدوو ساڵی ڕابردوو ئەم كاتە رێژەكە لەزۆربەی ناوچەكان زیاترە .
هەروەها گوتی: لە ئێستادا قۆناغێكی نوێی سوری ئینسۆ لە رۆژھەڵات و ناوەراستی زەریای ھێمن دەستیپێكردوە و كۆتایی بە دیاردەی لانینا ھاتووە كە ھۆكارێكی بەھێزبوو بۆ ئەو وشكە ساڵییەی رووی كردە ناوچەكە و لەئێستادا گۆراوە بۆ نیوتراڵ یان قۆناغی ھاوسەنگ كە تا كۆتایی ئەم وەرزە بەردەوامی ئەبێت سات بۆ ساتیش پلەی گەرمی رۆژھەڵات و ناوەراستی زەریاكە بەرزتردەبێتەوە و ئەگەر ھەیە لەھاوینی ئەمساڵدا دیاردەی ئێل نینۆ دەستپێبكاتەوە كە كاریگەری لەسەر وەرزی بارانبارینی 2023 بۆ 2024 ئەبێت بە زیادبوونی بارانبارین و گۆڕانكارییەكانی پێچەوانەی سوری لانینا لەسەر ناوچەكانمان ئەبێت .
گوتیشی: مانگی ئایندە بە تێكرای پێشبینی و چاودێری سەنتەرە كەشناسیەكانی جیھان چاوەروان دەكرێت مانگێكی باراناوی بێت و لەتەواوی ناوچەكانی ھەرێم و عێراقدا ئاستی دابارین لەسەروو رێژەی ئاساییەوە تۆماربكرێت ، تێكرای پلەكانی گەرما نزیك دەبن لە ئاستی ئاسایی ئەو مانگە.
دەشڵێت: مانگی چوار یەكێكە لەو مانگانەی پلەكانی گەرما تیایدا گۆڕانكاری خێرایە لە نزمبوونەوە و بەرزبوونەوەدا بۆیە ناجێگیربوونی كەشوھەوای زیاتر ئەبێت بەڕاورد بە مانگەكانی پێش خۆی ئەمەش لەباراناوی بوونی ئەو مانگەدا ئەبێتە ھۆی زیادبوونی دیاردەكانی چالاكبوونی ھەورە ترشقە و بارانی بەخوڕ و تەرزە كە زۆر كات بەھۆیەوە بەرزبوونەوەی ئاستی ئاو و لافاو و لافاوی خێرای لەناوچەكاندا لێدەكەوێتەوە ،سەرەرای ئەوەی گۆڕانی كەشوھەواش ھۆكارێكی دیكەیە بۆ توندبوونی ئەم دیاردانە كە لەم ساڵانەی دوایدا زیاتر ئەبینرێت.
پلەکانی گەرما گۆڕانکاریان بەسەردا دێت
