به‌ڕێوه‌به‌رایه‌تی هاتوچۆی پارێزگای دهۆك ئه‌مڕۆ دووشه‌م ڕایگه‌یاند كه لێخوڕین و چوونی ماتۆڕسكیل بۆ گه‌شت و سه‌یرانگاكان به‌هه‌موو شێوه‌یه‌ك قه‌ده‌غه كرا و هه‌ر ماتۆڕسكیلێكیش له سه‌یرانگاكان ببینرێ ده‌ستی به‌سه‌ردا ده‌گیرێ.
نه‌قیب شڤان ئیحسان به‌ڕێوه‌به‌ری ڕاگه‌یاندنی به‌ڕێوه‌به‌رایه‌تی هاتوچۆی پارێزگای دهۆك له لێدوانێكی تایبه‌تدا بۆ (كوردستان تیڤی) گوتی: هه‌موو شوفێرانی ماتۆڕسكیل ئاگادار ده‌كه‌ینه‌وه كه به‌هیچ شێوه‌یه‌ك نابێت به ماتۆڕسكیل سه‌ردانی شوێنه گه‌شتیاری و سه‌یرانگاكان بكه‌ن و ببنه هۆكاری بێزاركردنی هاووڵاتییان.
گوتیشی: هه‌ر ماتۆڕسكیلێك له شوێنی گه‌شت و سه‌یرانگاكان ببینرێت، له‌لایه‌ن تیمه‌كانی هاتوچۆی پارێزگای دهۆكه‌وه ده‌ستی به‌سه‌ردا ده‌گیرێت و لێكۆڵینه‌وه‌ی یاساییش له‌گه‌ڵ شوفێره‌كه‌دا ده‌كرێت.
به‌ڕێوه‌به‌ری ڕاگه‌یاندنی به‌ڕێوه‌به‌رایه‌تی هاتوچۆی دهۆك جه‌ختیشی كرده‌وه كه مه‌به‌ستیان له‌م بڕیاره ئه‌وه‌یه كه هاووڵاتییان له كاتی گه‌شت و سه‌یراندا كاتێكی خۆش به‌سه‌ر ببه‌ن و ماتۆڕسكیله‌كان نه‌بنه هۆكاری بێزاركردنیان.