دەستەی گشتی کەشناسی و بوومەلەرزەناسی عێراق رایگەیاند، ئەمڕۆ بوومەلەرزەیەک لە سنووری پارێزگای ئەنبار روویدا.
لە راگەیەندراوەکەدا هاتووە، کە بوومەلەرزەکە بە پلەی 3.3 پلەی رێختەر لەلایەن هاووڵاتیانەوە هەستیپێکراوە.
ئاماژە بەوەشدرا، بوومەلەرزەکە لەدووری 86 کیلۆمەتر لە رۆژئاوای شارۆچکەی روتبە لە پارێزگای ئەنبار روویداوە.
لەدوای بوومەلەرزەکەی 6ـی شوباتی 2023ـەوە کە تورکیا، باکووری کوردستان، سووریا و رۆژئاوای کوردستانی گرتەوە و لە هەرێمی کوردستان و وڵاتانی دراوسێش هەستی پێکرا، ژمارەیەکی زۆری پاشلەرزە روویانداوە، رۆژانەش چەندین بوومەلەرزە بە پلەی جیاواز لە ناوچە جیاوازەکانی رۆژهەڵاتی ناوەڕاست و دەوروبەری روودەدەن.
دوایین بوومەلەرزەش لە هەرێمی کوردستان، رۆژی 25ـی ئەم مانگە روویدا، بەشی پێشبینی کەشناسی و بوومەلەرزەزانی هەرێمی کوردستانیش لەوبارەیەوە رایگەیاندبوو: بوومەلەرزەکە بە گوڕی 4.3 پلەی رێختەر لە هەرێمی کوردستان روویدا، ناوەندی بوومەلەرزەکە لە سنووری نێوان هەولێر- مووسڵ بووە و لە قوڵایی پێنج کیلۆمەتر رووی داوە، لە زۆربەی شارەکانی هەرێمی کوردستانیش هەستیپێکرا.