ئەمڕۆ شەممە 2023.2.18، ئومێد خۆشناو، پارێزگارى هەولێر، لە دیوانى پاریزگا پێشوازی لە مەتران ئەلئەرشمندرین ئوشاکان کولکولیان، سەرۆکى تائیفەی ئەرمەنی ئه‌رسه‌دۆكس لە عێراق و شاندێکی یاوەری كرد.
لە دیدارەکەدا پارێزگارى هەولێر، بەخێرھاتنی میوانانی بۆ هەولێرى پایتەختى هەرێمى کوردستان کرد و ھیوای گەشتێکی سەرکەوتووی بۆخواستن، دواتر گفتوگۆ لە بارەی برایەتی و ئاشتی و خۆشەویستی و پێکەوە ژیانى نێوان پێکھاتەکانی کوردستان کرا و جەخت لە برەودان بە پێکەوەژیانی ئایینی لە هەرێمى کوردستان کرایەوە، کە بۆتە مەڵبەند و نموونەى پێکەوە ژیانى ئاینى و نەتەوەیى لە ناوچەکەدا، لەوبارەیەشەوە پارێزگارى هەولێر تەئکیدى لەوە کردەوە کە هەرێمى کوردستان لە نێویشدا هەولێرى پایتەخت هەمیشە بە لانەى پێکەوەژیان و لێبوردەیى و ئاشتەوایى بۆ هەموو پێکهاتەکان دەمێنێتەوە.
پاشان سەرۆکى تائیفەی ئەرمەنی ئه‌رسه‌دۆكس لە عێراق، سوپاسی پارێزگارى هەولێرى کرد بۆ ئەو دیدارە و جەختى لەوە کردەوە برایەتى ئەرمەن و کورد مێژوویەکى دێرینى هەیە و ڕایگەیاند: “هەولێر بە ماڵى دووەمى خۆم دەزانم، چونکە شارى هەولێر لاى من تایبەتمەندى خۆى هەیە و لە 30 یەکانى سەدەى ڕابردوو باوکم لەو شارەدا ژیاوە و کارى کردووە، هەمیشە بە جوانى و پاکى و باشى خەڵکەکەى باسى هەولێرى بۆ کردووین، بۆیە هیوا دەخوازین هەرێمى کوردستان و هەولێری پایتەخت هەمیشە بە نموونەى سەقامگیرى و پێشکەوتن و بەها بەرزەکانى مرۆڤایەتى بمێنێتەوە”.
لە کۆتایشدا، شاندەکە، پوختەیەکیان لە بارەى دۆخى ئەرمەنەکان لە شارەکانى عێراق و هەرێمى کوردستان و کار و ئەرک و کێشە و داواکارییەکان کرد و پارێزگارى هەولێریش هەموو پاڵپشتى و هاوکاریى و ئاسانکارییەکى بۆ ڕاییکردن و سەرکەوتنى کارەکانیان دووپاتکردەوە.