جوتیار عادل، گوتەبێژی حکومەتی هەرێمی کوردستان سەبارەت بە راگەیاندنی سێ رۆژ پشوو باسی لەوەکرد، ئەو سێ رۆژەی کراوەتە پشوو، بۆئەوەیە زیاتر لە دۆخی بوومەلەرزە ئاگاداربین، بە مەبەستی پاراستنی ژیان و سەروماڵی هاووڵاتیانی هەرێمی کوردستان لەئەگەری لێکەوتەکانی بوومەلەرزەکەی تورکیا و سووریا.
گوتەبێژی حکومەتی هەرێمی کوردستان لە کۆنفرانسێکی رۆژنامەوانیدا لەبارەی هاوکارییەکانی هەرێمی کوردستان بۆ لێقەوماوانی بوومەلەرزە لە باکووری کوردستان و تورکیا و رۆژئاوای کوردستان و سووریا، رایگەیاند، سەرۆکی حکومەت پێشنیازی کەمپەینێکی کۆکردنە و گەیاندنی کۆمەکی کردووە بۆ هاوکریکردنی هەردوو وڵات، ئەنجوومەنی وەزیرانیش پێشنیازەکەت پەسەند کردووە.
ئاماژەی بەوەشدا، بۆ رێکخستنەوە و ئاراستەکردنێکی دروستی ئەم کەمپەینە، پارێزگاکارەکان و ئیدارە سەربەخۆکان بەم ئەرکە راسپرێردران، کە ئەمەش عورف و یاسایەکە بۆ کاتی رووبەڕووبوونەوەی کارەساتێکی لەمجۆرە.
جوتیار عادل سوپاسی هاووڵاتی هەرێمی کوردستانی کرد بۆ دەستپێشخەرییان لە پێشکەشکردنی هاوکاری لەو کەمپەینەدا.
گوتەبێژی حکومەتی هەرێمی کوردستان راشیەگەیاند، تیمەکانی ئێمە ئێستا لە تورکیان و لەکارەکانی خۆیان بەردەوامن، نزیکەی 84 کارمەندی تەندروستی هەرێمی کوردستان لە تورکیایە و لە هەوڵی ئەوەشداین، بچنە سووریا، هەندێک بەربەست هەیە بۆ چوونە سووریا کە هیوادارین لە چەند کاتژمێری داهاتوودا چارەسەر ببن و هاوکارییەکانمان بگەن بەوێش.
تیمی فریاگوزاری هەرێمی کوردستان لە 84 کەس پێکدێت و 25 ئۆتۆمبێلی فریاگوزاری بۆ ناوچە زیانلێکەوتووەکان نێردراون، هەروەها 30 پزیشک لە پسپۆڕییە جیاوازەکان رەوانەی تورکیا کراون.
رۆژی 6/2/2023 دوو بوومەلەرزە باکووری کوردستان و تورکیا، هاوکات بوومەلەرزەیەک رۆژئاوای کوردستان و سووریای هەژاند، کە گوڕی بوومەلەرزەکان لە سەرووی حەوت پلەی رێختەرەوە بوون، زیانی زۆری لێکەوتەوە تا ئێستا تیمەکان سەرقاڵی گەڕان و رزگارکردنی ئەو کەسانەن کە کەوتوونەتە ژێر داروپەردووی خانوو و باڵەخانەکان