ژماره‌ی قوربانیانی بوومه‌له‌رزه‌كه‌ی توركیا و سووریا گه‌یشته 11 هه‌زار و 200 كه‌س، هێشتا تیمه‌كانی فریاگوزاری سه‌رقاڵی رزگاركردنی ژیانی به‌شێك له‌و كه‌سانه‌ن، كه كه‌وتوونه‌ته ژێر داروپه‌ردووی بینا رووخاوه‌كان.
به‌رپرسانی تیمه فریاگوزاری و پزیشكییه‌كان رایانگه‌یاند، له توركیا 8 هه‌زار و 574 كه‌س گیانیان له‌ده‌ستداوه و له سووریاش 2 هه‌زار و 662 كه‌س به هۆی بوومه‌له‌رزه‌كه‌وه گیانیان سپاردووه. به‌م ئه‌نجامه‌ش، ژماره‌ی قوربانیان گه‌یشتووه‌ته 11 هه‌زار و 236 كه‌س.
هه‌ر له‌و چوارچێوه‌یه‌دا، ئه‌مڕۆ سه‌رۆكی توركیا، ره‌جه‌ب ته‌یب ئه‌ردۆغان گوتی: 50 هه‌زار كه‌س بریندار بوونه و به‌شێكی زۆریان گواستراونه‌ته‌وه بۆ نه‌خۆشخانه.
به گوێره‌ی زانیاری سه‌رچاوه حكومییه‌كان، له سووریادا 5000 كه‌س بریندار بوون.
سه‌رچاوه: فرانس پرێس