سه‌رله‌به‌یانی ئه‌مڕۆ هه‌ینی له پارێزگای دهۆك به‌هۆی كه‌وتنه‌وه‌ی ئاگر له چادرێكدا كه‌سێك سووتا و گیانی له‌ده‌ست دا.
به‌رگریی شارستانی دهۆك ئاشكرای كرد: سه‌رله‌به‌یانی ئه‌مڕۆ هه‌ینی كاتژمێر 10:30 له بوونی ڕووداوێكی ئاگركه‌وتنه‌وه له گه‌ڕه‌كی زه‌ڕكه له شاری دهۆك ئاگاداركراینه‌وه و دوای گه‌یشتنمان به شوێنی ڕووداو ده‌ركه‌وت كه چادرێك گڕی گرتووه و سووتاوه.
ڕاشیگه‌یاند: دوای كوژانه‌وه و كۆنتڕۆڵكردنی ئاگره‌كه، ده‌ركه‌وت كه كه‌سێك له‌نێو چادره‌كه بووه و به‌داخه‌وه سووتاوه و گیانی له‌ده‌ستداوه.
به‌رگریی شارستانی دهۆك هه‌روه‌ها ڕایگه‌یاند: به‌گوێره‌ی زانیارییه سه‌ره‌تاییه‌كان ده‌ركه‌وتووه كه ئه‌و كه‌سه‌ی له‌نێو چادره‌كه سووتاوه و گیانی له‌ده‌ستداوه به ڕه‌گه‌ز عاره‌به و له باشوور و ناوه‌ڕاستی عێراق به مه‌به‌ستی كاركردن و كاسبی هاتووه بۆ شاری دهۆك.
ئاماژه‌ی به‌وه‌ش دا كه هۆكاری ڕووداوه‌كه تا ئێستا دیار نییه، چونكه له‌نێو چادره‌كه هیچ سه‌رچاوه‌یه‌كی كاره‌با یاخود سۆپا نه‌بووه، ئێستاش تیمه‌كان خه‌ریكی لێكۆڵینه‌وه‌ن له ڕووداوه‌كه.