وه‌زاره‌تی ناوخۆی حكومه‌تی هه‌رێمی كوردستان هه‌مواری رێنمایی پێدانی مۆڵه‌تی جام ره‌شی ئۆتۆمبێل بڵاوكرده‌وه، كه ئاماژه به كه‌مكردنه‌وه‌ی وه‌رگرتنی رسوماتی ئه‌نجامدانی ئه‌و مامه‌ڵه‌یه ده‌كات.
ئه‌مڕۆ دووشه‌ممه (31ی تشرینی یه‌كه‌م/ئۆكتۆبه‌ری 2022)، وه‌زاره‌تی ناوخۆی حكومه‌تی هه‌رێمی كوردستان، رێنمایی ژماره 8ی ساڵی 2022ی بڵاوكرده‌وه كه تایبه‌ته به هه‌مواركردنه‌وه‌ی رێنمایی ژماره 5ی ساڵی 2019ی تایبه‌ت به پێدانی مۆڵه‌تی جام ره‌ش به ئۆتۆمبێل له هه‌رێمی كوردستان.
له رێنماییه‌كه‌دا، وێڕای دیاریكردنی رسوماتی ساڵانه بۆ ئه‌و مه‌به‌سته به‌گوێره‌ی رێژه‌ی ره‌شكردنی جامی ئۆتۆمبێله‌كان كه له 300 هه‌زار دینار بۆ 800 هه‌زار دینار ده‌بێت به‌گوێره‌ی رێژه‌ی تاریكی جامی ئۆتۆمبێله‌كان، هه‌روه‌ها بڕی 30 هه‌زار دیناریش دانراوه بۆ ده‌ركردنی باجی رێگه‌پێدانی ره‌شكردنی جامی ئۆتۆمبێل.
هه‌روه‌ها 500 هه‌زار دینار دیاریكراوه بۆ سزادانی ئه‌و ئۆتۆمبێلانه‌ی به‌بێ مۆڵه‌ت یان به‌پێچه‌وانه‌ی ناوه‌ڕۆكی رێنماییه‌كه جامه‌كانیان ره‌شكردووه، سه‌ره‌ڕای ده‌ستبه‌سه‌رداگرتنی ئۆتۆمبێله‌كه بۆ ماوه‌ی سێ رۆژ.
له رێنماییه‌كه‌دا ئاماژه به‌وه‌كراوه، ئه‌و ئۆتۆمبێلانه‌ی رێژه‌ی تاریكی جامه‌كانی له‌لایه‌ن كۆمپانیای دروستكه‌ره‌وه تا رێژه‌ی 30% بێت، به‌و مه‌رجه‌ی به له‌زگه جام ره‌شنه‌كرابێت، ئه‌وا هیچ رسوماتێكی لێوه‌رناگیرێت و لێپرسینه‌وه‌ی له‌گه‌ڵدا ناكرێت.
له‌گه‌ڵ ئه‌وه‌شدا ئه‌گه‌ر رێژه‌ی تاریكی جامی ئۆتۆمبێل له نێوان 30% بۆ 50% بێت، ئه‌وا پێویسته رسوماتی رێژه‌ی 50% بدات، هه‌روه‌ها ئه‌گه‌ر رێژه‌ی تاریكی له 50% بۆ 80% بێت، ئه‌وا ده‌بێت رسوماتی رێژه‌ی 80% بدات، ئه‌گه‌ر له‌و رێژه‌یه‌ش زیاتربوو، ئه‌وا رسوماتی رێژه‌ی 80% و 200 هه‌زار دیناری دیكه ده‌دات.
