وەزیری بازرگانیی حکوومەتی هەرێمی کوردستان گوتی، تاوەکوو ئێستا چەکی پارەی گەنمی ساڵی 2014ی جووتیارانی هەرێمی کوردستانیان بەدەست گەیشتووە و کار دەکەن بۆ ئەوەی پارەکە بنێردرێت بۆ بانکەکانی هەرێمی کوردستان و کە پارەکە گەیشت بەسەر جووتیاراندا دابەش دەکرێت.
کەمال موسلیم، وەزیری بازرگانیی حکوومەتی هەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی: ”خەرجکردنی پارەی جووتیارانی هەرێمی کوردستان ئەوەندە ئاسان نییە و چەکی پارەکە هاتووە و پێویستە پارەکەی لە بانکی ڕافیدەینەوە بۆ بانکەکانی خۆمان بگوازرێتەوە، بۆیە جارێ چەکەکانمان بەدەست گەیشتووە و کاری لەسەر دەکەین بۆ ئەوەی پارەکە خەرج بکرێت.”
کەمال موسلیم گوتیشی: ”جارێ سەرقاڵی تەواوکردنی ڕێکارەکانین و هەرکاتێک تەواو بوو و پارەکە خەرج کرا دەست بە دابەشکردنی بەسەر جووتیاراندا دەکرێت، ئەوە پارەی گەنمی ساڵی 2014ی جووتیارانە کە هێشتا لای حکوومەتی عێراق ماوە و خەرج نەکراوە.”