بڕیاری بەقەزابوونی ناحیەی سیدەکان قۆناغی باشی بڕیووە
سەرپەرشتیاری ئیدارەی سەربەخۆی سۆران گوتی، بڕیاری بەقەزابوونی ناحیەی سیدەکان قۆناغی باشی بڕیووە و خەریکی تەواوکردنی رێکارەکانین و ئێستا گەیشتۆتە ئەنجوومەنی وەزیران و کاری لەسەر دەکەن، ھەرکاتیش تەواو بێت فەرمانی بۆ دەردەچێت و بەفەرمیی دەبێتە قەزا.
ھەڵگورد شێخ نەجیب، سەرپەرشتیاری ئیدارەی سەربەخۆی سۆران رایگەیاند : “لەچوارچێوەی بڕیاری ئیدارەی سەربەخۆی سۆران ناحیەی سیدەکان دەکرێتە قەزا و قۆناغی گرنگی تێپەراندووە و کاری باشی لەسەر کراوە و بەردەوام پڕۆژەی لێ ئەنجامدەدرێت و رێکارەکانیش تەواو دەکرێن کە پێویستن بۆ ئەوەی ببێتە قەزا”.
ھەڵگورد شێخ نەجیب گوتیشی: “ئێستا بڕیاری بەقەزابوونی سیدەکان لە ئەنجوومەنی وەزیرانە و کاری لەسەر دەکرێت و تەنھا ماوە فەرمانی بۆ دەربچێت و بەفەرمیی ئەو ناحیەیە ببێتە قەزا، چونکە رێکارەکان بەردەوام کاری لەسەر دەکرێت، وەکو ئەنجامدانی پڕۆژە و شوێنی دانیشتووان و زیادکردنی ناحیەیەک بۆ قەزا، کە بڕیارە لەدەشتی ھەرتێ ھەندێک گوند ھەیە یەک دوو شوێن دیاریکراوە یەکێکیان بکرێتە ناحیە، بۆیە کاری زۆر باشی بۆ کراوە و قۆناغی زۆر باشی بڕیووە”.