سەجا شێرزاد – دهۆک
ئێک ساڵ ب سەر سەربەخۆبوونا ئیدارا باژێرێ زاخۆ دا ھاتە دەربازکرن، ل دەمەکێ خەلکێ زاخۆ ب گەرمی ل ھێڤییا ڤێ بریارێ بوون و خۆ ژھەژی ددیت، ھەتا ل پار ساڵ رێکەفتی ٢٠-٩-٢٠٢١ێ بریارا سەربەخۆبوونا زاخۆ ژلایێ ئیداریڤە ژلایێ حکومەتا ھەرێما کوردستانێ ب سەرپەرشتییا مەسرور بارزانی سەروکێ حکومەتا ھەرێما کوردستانێ ھاتییە دان و ھەر ژوێ رۆژێ زاخۆ کەفتییە ژێر قۆناغەکا دییا ئاڤەدانکرن و پێشکەفتنێ،
ل زاخۆ و ھەر ژمەھا ئێکێ گهورینێن باش یێن ئیداری دەسپێکرینە، و ژوێ رۆژێ و ھەتا ساڵەک دەربازبووی ١١٥ پرۆژەیێن گرنگ ل زاخۆ کەفتنە وارێ جێبەجێکرنێ و بەشەکێ مەزن ژوان پرۆژەیان ژی ب دویماھیک ھاتن، چونکە دپلانا حکومەتا ھەرێما کوردستانێ دا بوو ھەمی ئاسانکری دبرێڤەبرنا وان پرۆژەیان دا بھێنە کرن یێن گرێدایی ژیانا خەلکێ،
ژوان پرۆژەیێن گرنگ یێن ھاتینە ئەنجامدان نویژەنکرنا چەندین قۆتابخانەییان بوویە بۆ دەربازبوونا سالەکا ھەرە باش یا خواندنێ، دیسان نویژەنکرنا بنگەھێن تەندروستی و نەخۆشخانەیان ل زاخۆ ھەروەسا دروستکرنا ئوڤەر پاس و ئەندەر پاس و و جێبەجێکرنا پرۆژەیێن رێک و پر و بانان، دروستکرنا سکرێن نقوم یێن ئاڤێ، پاراستنا پرۆژێ دروستکرنا یەکێن نیشتەجێبونێ بۆ خێزانێن کێم دەرامەت، دروستکرنا باغچە و پارکان، و جێبەجێکرنا پرۆژەیێن گەشتیارییێن تەرفیھی، گەھاندنا کارەبێ بۆ خالێن پێشمەرگەی ل چیایان، کولانا بیران، دروستکرنا خانیێن پلاستیکی بۆ جوتیاران، کرینا ئامیرێن چاندنێ، روناھیکرنا پرا دەلال و گەلەک پرۆژەیێن دی، ھەتا کوژمێ وان پارێن بۆ پرۆژەیان ھاتینە مەزاختن گەھشتینە پتری ٩٠ ملیارێن دینارێن عیراقی.
زاخۆ گرنگییا خۆ نە ب تنێ ل سەر ئاستێ ھەرێما کوردستانێ ھەیە بەلکو ل سەر ئاستێ عیراقێ و رۆژھەلاتا ناڤەراست، باژێرەکە ب دوو وەلاتێن جیرانڤە گرێدایە تورکیا و سوریا و دوو دەروازیێن ھەرە گرنگ لێ ھەنە پێشییا بیرێ و دەروازەییا ئیبراھیم خەلیل کو دەرگەھەکێ سەرەکییە ھەمی داھاتی و دەرچوو و رێڤینگ ژوەلاتێن بیانی و ھەرێما کوردستانێ تێدا دەرباز دبن،
زاخویان رولەکێ گرنگ دشورەشێن کوردان دا ھەبوویە و شەرەکێ مەزن کرییە و چەندین شەھید داینە، و ل شەرێ داعش ژی زاخۆ بوویە جهەکێ سەرەکی بۆ حەواندنا ژمارەیێن ھەرە مەزنیێن ئاوارە و کوچبەرێن خەلکێ شنگال،
ھەروەسا زاخۆ ل سەر ئاستێ پێکڤە ژیانێ خۆشتڤیترین جهێ ژیانا کرستیانانە و ھەر دکەڤن دا جیهی لێ نیشتەجێبوون و ھەتا نوکە دوو تاخێن گرنگ ل زاخۆکا کەڤن ھەنە ئێک ب ناڤێ مەحلا جیھییان و ئێک ژی مەحەلا فەلان و ل ڤان دویماھییان ژی ژمارەیەکا مەزنیا ئێزدیان لێ دژین ژبلی خەلکێ زاخۆیێ موسلمان.
ل باوەشا پرا دەلال ئاھەنگەک ب ڤێیادێ ھاتە گێران چەندین چاڵاکییێن گرنگ لێ ھاتنە ئەنجامدان ژوان ژی ستران گوتن و سەما کرن و خلات ژی ژبۆ سێ داھێنەرێن گەنجێن زاخۆ ھاتینە پێشکێشکرن ئەو ژی خەلاتەک بۆ داھێنەرێ دلێ دەستکرد نوژدار ئازاد کو ئێکەم کەس بوو ل سەر ئاستێ جیھانیڤێ داھێنانێ ئەنجام بدەت، ھەر وەسا داھێنەرێ ئای تی ئەیمەن و داھێنەر ئەندازیار ئومێد کو ھاریکاربوویە دئەندازیارکرن و پلاندانانێن گرنگ ژبۆ چاندنێ ل زاخۆ.
ئیدارا سەربەخۆیا زاخۆ ل ئاھەنگێ راگەھاند کو ئەوان پلانەک باشتر و موکومتر بۆ ساڵا دووێیا سەبەخۆبوونا زاخۆ ھەیە و ساڵ بۆ ساڵێ دێ ئاستێ زاخۆ بەرەف پێشڤە چیت.
ل زاخۆ ل ساڵا بووری ٦ رێڤەبەری بووینە رێڤەبەریێن گشتی و ١٤ بنگەە و ھوبە ژی ئاستێ وان ھاتییە بەرزکرن بووینە رێڤەبەری.