ئەمڕۆ شەممە 24ـی 09ـی 2022 بە گوژمەى نزیکەى 500 ملیۆن دینار قۆناغى دووه‌م و سێیەمى پڕۆژەی قیڕتاوكردنی گەڕەكی ڕۆشنبیری دەستی پێ کرد.
ڕاگەیاندنی پارێزگای هەولێر ڕایگەیاند: قۆناغى دووەم و سێیەمى پڕۆژەی قیڕتاوكردنی گەڕەكی رۆشنبیری بە گوژمەى 433 ملیۆن و 640 هەزار دینار لەسەر داهاتى 15%ـى سەرۆکایەتى شارەوانیى هەولێر كەوتۆتە بواری جێبەجێكردنەوە.
هەر لە ڕاگەیەنراوەکە هاتووە کە قۆناغى دووەم و سێیەمى پڕۆژەکەش بەمشێوەیە:
1- قیڕتاوکردنی چەند شەقامێک لە پشت گۆڕستان/ قۆناغى دووەم، بە گوژمەی 174 ملیۆن و 335 هەزار دینار لەسەر 15% داهاتی سەرۆکایەتیی شارەوانیی هەولێر، پڕۆژەکە پێک دێت لە ئامادەکردن و قیڕتاوکردنی 14 شەقام و بە ڕووبەری 11900 مەتر.
2- پڕۆژەی قیڕتاوکردنی گەڕەکی ڕۆشنبیری پشت گۆڕستان/ قۆناغى سێیەم، بە گوژمەی 259 ملیۆن و 305 هەزار دینار كە لە 17 کۆلان پێکهاتووە و نزیکەی 17600 مەتر قیڕتاو لەخۆ دەگرێت، لەسەر 15%ى داهاتى سەرۆکایەتیی شارەوانیی هەولێر جێبەجێ دەکرێت.