بوونی پێشەنگ لە ژیانماندا

عومەر چنگیانی

پێشەنگ: ئەو کەسەیە کە دەبێتە نموونەی باڵا تا چاوی لێبکرێت لە هەڵسوکەوت و کردار و ڕەفتاری، کە پێویستە ئەو کەسە قسەکانی لەگەڵ کردەوەکانی یەکتر بگرێتەوە، تەنانەت ڕابەر و پیشەنگ دەبێت لە ئاستێکی زۆر باڵا ڕەفتار بکات وهەردەم ڕابەر ئەوانەن کە خەسڵەتی خێر و بەرەکەت لە ژیانیان ڕەنگ دەداتەوە وکاریگەری زۆریان لەسەر شوێنکەوتەکانیان دەبێت هەربۆیە دەبینین، لە هەڵسەنگاندن و پێدا گوتنی شایان و نرخاندنی قورئان بۆ پێشەوامان محەممەد – دروود و سڵاوی خوای لەسەربێت – لە بیست و یەکهەمین ئایەتی سورتی (ئەلئەحزاب)دا دەفەرمێت: (بەڕاستی پێشەنگ و مامۆستایەتی و پێشەوایەتی لە پەیامگەیێنەکەی الله دا هەیە بۆ ئەوکەسانەی کە بڕوایان بە ڕازی بوونی خوا و دابین بوونی باشی ڕۆژی سەڵا هەیە و هەمیشە و بەزۆری خوایان لە یادە).
بەڵێ… لەکاتێکدا کە باس لە پێشەنگی باش دەکەین دەبێ لەوەیش ئاگاداربین کە دەکرێ بەناو ڕابەری خراپەیش هەبێت و زۆر بەداخەوە وەك دەبینین ئێستا گەنجەکانی ئێمە جارجار دوای ڕابەرێك دەکەون کە تایبەتمەندی پێشەنگ بوون لە خۆ ناگرێ وەکو ئەوانەی پێیان دەگوترێ مۆدێل، یان هەڵسوکەوتێك کە نە خێری دنیا و نە خێری قیامەتی تێدایە، وەکچۆن دەبێ ئەوەیشمان لەیاد بێت کە مەرج نیە ئەوانەی ڕابەربن لە زانایانی ئایینی بن، هەرچەندە دەکرێت ئەوانەیان کە مەنهەجێکی ڕاست و ڕەوانیان پێیە بکرێنە پیشەنگ و مامۆستا و چاوساغ و دەکرێ ببنە پێشەنگ بۆ فێرخوازەکان و دەکرێ باوك ببێتە پێشەنگ بۆ ڕۆڵەکانی سەرۆك ببێتە پێشەنگ و ڕابەر بۆ خەڵکی کۆمەڵگا و بۆیە لەسەر ئیماندار پێویستە دانا و ژیر بێت لە دیاری کردنی پێشەنگ و چاوساغ لە کۆمەڵگا.
ڕابەری سەرڕاست و تایبەتمەندیەکانی : دەکرێ ڕابەر، یان پێشەنگ، بۆ دوو جۆری سەرەکی دابەش بکەین، ڕابەری چاوساغ، یان ڕابەری خراپ و لارولەوێر، خوای گەورەش بڕیاری داوە کە هەموومان بە دوای ڕابەریەتی پێغەمبەران و پیاوچاکان بچین لەوە ئاگادارمان دەکاتەوە بە دوای ڕێچکەی شەیتان نەکەوین و نەیانکەین بە ڕابەر .
تایبەتمەندی ڕابەری ئەرێنی و چاك:
1 / پێویستە ڕاستگۆ و ڕاستەڕێ بێت لە بنەماکانی ئایینەکەی .
2 / قسە و کرداری یەك بن.
3 / لەسەر ڕێچکەی ڕاست بێت لە دین و دنیا.
کاریگەری ڕێبەر لەسەر شوێنکەوتەکانی : زۆرێکمان خەمی ئەوەمان لەبەرە ڕۆڵەکانمان چۆن وا لێبکەین کە ببن بە پارێزگاری دین و ژین و وڵات و سەربەرز بین پێیان، بۆ ئەو مەبەستە پێویستە هەموومان ببین بە پیشەنگ بۆیان لە کردار و گفتار.
باشە ئەگەر باوك خۆی لاڕێ بێت و هەڵسوکەوتی نەشیاو بێت و یان خوانەخواستە قسە و گفتاری یەك نەبێت، چۆن خوازیاری ئەوەیە ڕۆڵەکانی ڕاستەڕێ و چاوساغ بن؟ یان ئەگەر مامۆستا خۆی لاڕێ بێت و کەمتەرخەم بێت چۆن قوتابیەکانی ڕاستەڕێ دەردەچن؟ یان ئەگەر سەرۆك خۆی دادپەروەر نەبێت چۆن خەڵکی لە کۆمەڵگا دادپەروەر دەبن؟ چونکە مرۆڤەکان سەرسام دەبن بە کردار بەر لە قسە و گوفتار کە هەر لەو سۆنگەوە پێغەمبەری خوا – دروود و سڵاوی خوای لەسەربێت – ڕابەرایەتی هاوەڵانی دەکرد بە کردارەکانی بەر لە گوفتار و قسەکانی، خوای گەورە هانمان دەدات چاوی لێبکەینەوە، لە ژیاننامە و کردار و گوفتاری.
بەروبوومی پابەند بوون بە ڕابەری و پیشەنگی ڕاستەڕێ .
١ / هیدایەت وەرگرتن و پابەند بوون بە ڕێچەکی چاك و باش .
٢ / ڕەزامەندی خوای باڵا دەست لە ڕۆژی قیامەت .
٣ / ڕاگرتنی دڵی بەرامبەر و پابەند بوونیان بە ڕێچکە و بۆچوونی تۆ
ئەگەر تەماشای مێژووی مسوڵمانان بکەین زۆر ڕابەر و پیشەنگی نازدارمان هەیە، پرسیار لێرە ئەوەیە ئایا دەکرێ ئەوان لەیاد بکەین و شوێن ڕابەر و پیشەنگی لارولەوێر بکەوین، بۆ نمونە وەکو صلاح الدینی ئەیوبی کە نمونەیەکی ناوازە بووە لە مێژووی مسوڵمانان.

پەراوێز:
گۆشەی ئیمڕۆمان پوختەی گوتاری پێشنیازکراوی بۆردی باڵای ئامادە کردنی گوتاری هەینی بوو کە توێشووی گوتاری زنجیرە ١٦٨ی ئێمەبوو لە سەردوانگەی مزگەوتی خەدیجە کوبرا لە ٢٠ی سەفەری١٤٤٤بەرانبەر بە ١٦ی ئەیلولی٢٠٢٢.