ئەسعەد عەدۆ
کاتێ لەسەر درێژی شیعری ناڵەی جودایی مامۆستا (هێمن موکریانی)ئەگەر هەلە نەبم(۱۳۰) دێر بوو، رەخنەباران کرد ! لەوەڵامدا گووتی : جا براڵە من تا ئێستا لە وڵاتێک دەژیم بە(مەڵەغان) دروێن دەکەم، من لە وڵاتی پیشەسازیدا ناژیم تا لەبەر پڕ ئیشی و چەقەچەقی ئامێرەکان تەنیا مەودای خوێندنەوەی چوار دێرە شیعرانم هەبێت ! لەکۆتاییدا
دەڵێ : جا قوربان هێشتا لێفەم لەسەر هەتیوان هەڵنەداوەتەوە !
جا هەڤاڵ و هاوبیرم کاک ( سیامەند بەننا) ئیفتیخار دەکەم کە برایەکی وەک جەنابت
بەخوێندنەوەی بابەتەکانم گەورەم دەکەن، بەڵام قوربان هێشتا هەکبەی گلوگازاندانی ئێمەمانان تەژیە ! نەک بۆ تاکە کەسی بەڵکو بۆ بێ موباڵاتی حیزب، دامودەزگا هەجۆرەکانی دەسەڵاتیان نەبونی یاسایەک بۆ چاودێری و سەرپەرشتی هێندێ توێژ کە
تەمەنی خۆیان بۆ وڵات و میڵەت سەرفکردوە
هەڤاڵ تۆ دەزانی لەوەتەی لە ساڵی (۱۹۹۲)وە، حکومەتمان دامەزراوە بۆ خودی خۆم
نەوەزیرو نەوەزارەتی بەناورۆشنبیری هەرێمم نەدیوە ! گوایە بەندە لەو مەیدانە هەژمار دەکرێم !
قوربان تۆ دەزانی لە دوایی راپەڕینەوە تا ئێستا نەمتوانیوە سەردانی دامودەزگاکانی حکومەت بکەم ! جارێکیان ( جمال عبدالناصر)سەرۆکی(مصر) بڕیاری وەزیری ئیرشادی بۆ ( محمد حسنێن الهیکل) دەرهێناوە، ئەویش بە تووڕەیی دەزگای خۆی بەرەوماڵ جێهێلاوە، ئینجا سەرۆک سەردانی دەکات ( چونکە برادەر بون) ئەویش پێی دەڵێ : خێرە خۆت لەماڵەوە ناوە ؟! ئەویش دەڵێ : سەرۆک من رۆژنامەنوسم بە مەقاڵێک کابینەنەی
حکومەت هەڵدەوەشێنمە، ئینجا بەڕێزت دەمکەیت بەوەزیر ؟!
هەڤاڵ گیان بەر لە راپەڕین هەموو سەرۆک جاشەکان دیوەخانیان هەبوو کە هەردەم پڕبوو، تێیاندا هەبوو ناندەربوو، هەبوو بە تلیفۆنێ کاری ئەو خەڵکەی دەوروبەری مەیسەر دەکرد، خەڵکی هەژارو بەلەنگازو لێقەوما هانایان بۆ دەهێنان ..
لە حەفتاکان کاتێ( محمد گۆران) لە لاوک چڕیندا دەیگووت : سەورەی کوردینێ لەمە
تێکدا کۆچک ودیوانا کوردەواری زۆرمان پێناخۆش بوو، کەچی ئەفسووس وادەرچوو !
هاوبیری بەڕێزم زۆرینەی ئەوانەی مۆری خیانەتمان لێدابوون بە رانکوچۆغەڵ و کراشی هەورامی سەردانی بەغدایان دەکردو ناو ئۆتۆنبێلەکانیان پڕبوو لە نەواری لاوک و حەیران، ئێستا منی ئاشق و ئەسیری نەریتی کوردەواری وێلم بەدوای دانیشتنی دیوەخانەیێ، بەخۆزگەی بەروبەرگووزی جەوهەرداری زاخۆیێ ناولەپان لێکەدەم کە زەمانێک بینەرانی(
لەکەلەپوورەوە) هۆنراوەیان بەسەر جلوبەرگ و پشبێنی قەفقەفی ئێمەیاندا هەڵدەگوت، لە ماوەی(۱٦) ساڵ مانەوەمان لەژێر سێبەری رژێمێکی دڕودژواردا توانیمان شۆڕشێکی فۆلکلۆری بەرپابکەین تا بتوانین بەردی بناغەی قوتابخانەیەک بۆ کەلەپووری باوان
دابمەزرێنین !
نەک بەندە بەڵکو هەموو توێژەکە بێ جیاوازی بەر لە راپەڕیندا بۆ خزمەتی ئەدەبیات
و هونەری کوردی داهێنانمان دەکرد ! کەچی ئێستا لەسایەی ئەو بارودۆخەی ئێستاکێ رۆژانە ئازیزانمان بەئێخسیری بەرەو گۆڕستان بەڕێدەکەین ! لە هێلکەکردنیش چوینەتەوە، چونکە هۆکارێ بۆ داهێنان کردن لەم وڵاتەدا نەماوە ! باشم وەبیرە کاتێ هونەرمەندی گەورەی کورد ( احمد سالار) لەبەرامبەر وەزارەتی بەرگری عێراق بە عینفوانەوە لەسەر شانۆ باسی لەگەڕانەوەی کوردە دوورخراوەکان لە (لیبیاو جەزایر) بۆ زێدی خۆیان دەکرد، شانۆی (کاتێ هەڵۆ بەرزە فڕێ)لەسێبەری دیواری وەزارەتی دیفاعەوە بۆ کوردستانیان
فڕاند !
لەسەر شاشەی تەلەفزیۆنی کەرکوكدا باسمان لە شان بەبڕنۆو نێک بەشەشاگر دەکرد
کەچی ئێستا رێز لەو پێناسەی پێشمەرگایەتی ناگیرێ !
هەموو فەرمانبەرێ، کارمەندێ، نووسەر، رۆژنامەنووس، وەرزشوان لە زەمەنی رژێمی دڕندە زەوی دەدرایێ ! هێندێکیش ئۆتۆمبێلی بەدیاری وەردەگرت هەندێکیش لەسەر بوودجەی دەوڵەت چارەسەری بۆ دەکرا، هەبوو خانوی میریان دەدرایێ نموونە زۆرن، دەمێکە گوتوومە : شیعە داوە مووێ بزر بکات لە (نجف) بۆی دەدۆزرێتەوە، کەچی ئێمە ( حوشترمان) لێوون دەبێ، دەرگایێ، شوێنێ شک نابەین ئەو، گرێکۆرەمان بۆ بکاتەوە خەڵک نازانێ سەر بۆ کێندەر هەڵگرێ ؟ ئەوەتە رەوکردنی گەنج و خانەوادەی کورد بۆ هەندەران بەراورد بە ساڵانی رابرد لەپێوەردەرچوە !
راستە لەوێ دادپەروەری هەیە، بارقورسی لەسەر تاک نیە خەڵک بێ شوێنی حەوانەوە
نیە بێ( تەئمینی تەندروستی) نیە ! بمرەوبژیش بێت لەوێ دەژی بەلام چێژی کوردستان وەک هیچ شتێک نیە،
خەڵکانێک هەس لە کوردستانی پڕ خێروبەرەکەت ژیانی بۆ مەیسەر نابێت، دەوڵەمەندانیشمان دەگەڵ پەیرەوی ئایینی خۆیان راست نین ئەگەرنا لەهەموو دونیادا خێرخوازەکان دەوری زۆر باشیان هەیە بۆ بەرزکردنەوەی ئاستی بژێوی میڵەت .
لەکۆتاییدا دەڵێم : بەداخەوە بارودۆخی زۆرینەی خەڵکی خۆمان خراپە پێویستی بە
پێداچوینەوەی جدی هەیە.