ئه‌مڕۆ چوارشه‌ممه 2022/8/24 به‌ڕێز نێچیرڤان بارزانى، سه‌رۆكى هه‌رێمى كوردستان، پێشوازى له به‌ڕێز ئیرڤن هیكس جوونیه‌ر كونسولى گشتیى نوێى ئه‌مه‌ریكا له هه‌رێمى كوردستان كرد.
له كۆبوونه‌وه‌یه‌كدا سه‌رۆك نێچیرڤان بارزانى وێڕاى به‌خێرهێنان، پیرۆزبایى لێكرد بۆ ده‌ستبه‌كاربوونى و هیواى سه‌ركه‌وتنى بۆ خواست، هه‌روه‌ها هه‌موو پشتگیرییه‌كى هه‌رێمى كوردستانى بۆ سه‌رخستنى ئه‌ركه‌ى نیشان دا.
لاى خۆیه‌وه به‌ڕێز كونسولى نوێى ئه‌مه‌ریكا خۆشحاڵیى خۆى به ده‌ستبه‌كاربوونى له هه‌رێمى كوردستان ده‌ربڕى و جه‌ختى له خواستى وڵاته‌كه‌ى بۆ بره‌ودانى په‌یوه‌ندییه‌كانى له‌گه‌ڵ هه‌رێمى كوردستان دووپات كرده‌وه.
هه‌ردوولا دوا پێشهاته‌كانى عێراق و كێشه‌كانى به‌رده‌م پرۆسه‌ى سیاسییان تاوتوێ كرد و له‌مباره‌یه‌وه سه‌رۆك نێچیرڤان بارزانى دووپاتى كرده‌وه كه چاره‌سه‌رى دۆخى عێراق ته‌نیا به گفتوگۆ و لێكگه‌یشتن له‌سه‌ر بنه‌ماى ده‌ستوور ده‌كرێت، هه‌روه‌ها باسى له دۆخى ناوخۆى هه‌رێمى كوردستان و گرنگیى یه‌كڕیزیى نێوان لایه‌نه سیاسییه‌كانى هه‌رێمى كوردستان كرد.
ده‌رباره‌ى په‌یوندییه‌كانیش، سه‌رۆك نێچیرڤان بارزانى دووپاتى كرده‌وه كه ده‌رفه‌تى هاریكاریى ئه‌مه‌ریكا له‌گه‌ڵ عێراق و هه‌رێمى كوردستان هه‌یه به‌تایبه‌تى له بوارى وه‌به‌رهێنان و كه‌رتى تایبه‌تدا.
شه‌ڕى دژى تیرۆر و مه‌ترسییه‌كانى داعش، گرنگیى بره‌ودان به دیموكراسى و پاراستنى مافه‌كانى مرۆڤ و ئازادییه‌كان و ئازادیى ڕاده‌ربڕین له هه‌رێمى كوردستان، دۆخى ناوچه‌كه به‌گشتى و چه‌ند پرسێكى دیكه‌ى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه بوون.