فەرهاد زیرەک کۆنسێرتێک لەسەر قەڵای هەولێر ساز دەکات
دوای ساڵانێکی زۆر دابڕان لە هونەری گۆرانیچڕین هونەرمەند (فەرهاد زیرەک) لەسەر داوای (ئومێد خۆشناو) پارێزگاری هەولێر بەنیازە کۆنسێرتێک لەسەر قەڵای هەولێر ساز بکات و چەند بەرهەمێکی نوێش لەوێ پێشکەش بکات، هاوکات خەرجی کۆنسێرتەکەش لەسەر ئەرکی پارێزگای هەولێر دەبێت، ئەمەش دەبێتە دوایین کار و بەرهەمی هونەریی هونەرمەندە پایسکلسوارەکەی هەولێر.
ئەم کۆنسێرتەی هونەرمەندی ناوبراویش دوای سەردانە مەیدانیەکەی پارێزگاری هەولێر دێت بۆ شەقامی ئیسکان، کە بەڕێ کەوت چاوی بەو هونەرمەندە کەوت و لەسەر داوای وی ئەو کۆنسێرتە ساز دەکرێت، بەڵام هیچ کاتێک بۆ سازدانی کۆنسێرتەکە دیاری نەکرا، تەنیا ئەوە نەبێت هونەرمەند ڕایگەیاند کە لە ماوەی داهاتوودا ئامادەکاری بۆ ئەو کۆنسێرتە بەرفراوانە دەکات و کۆتایی بە کاروانی هونەریی خۆی دەهێنێت.