سنوورێن هەرێما کوردستانێ بوینە گورەپانا شەرێن پەکەکە و سوپایێ تورکی

ل رۆژا چوارشەمبییا حەفتییا دەربازبووی، ل گوندێ پەرەخێ، ناحییا دەرکارێ، قەزا باتیفا ل سنوورێ ئیدارا سەربەخۆیا زاخۆ، گروپەکێ گەشتیاری ب مەرەما گەشتێ سەرەدان کربوو، هەڤدەم، ھێرشەک ب سێ توپان و راستەوخۆ دناڤا گەشتیاران دا ل سەر وی جهی هاتییە کرن، ب بەهانەییا شەرێ ناڤ بەرا سوپایێ تورکیا و ھێزا پەکەکێ، و دئەنجام دا ٣٣ کەس ژبریندار و گیان ژدەستدان بوونە قوربانی و ئەڤێ رویدانێ کارڤەدانێن توند یێن بیانی و ناڤخویی و حکوومەتی و جڤاکی ل دویف خۆ ھێلاینە.

ئێکەم جار نینە شەرێ پەکەکە و سوپایێ تورکیا ل ناوچەیێن هەرێما کوردستانێ دھێتە كرن و دئەنجامدا گەلەک جاران خەلکێ سڤیلێ هەرێما کوردستانێ دشەرێن واندا دبنە قوربانی، بەلکو ب درێژییا چەند ساڵانە چەندین گوند ژئەنجامێ شەرێن وان هاتینە چولکرن دارستان و رەز و باغ وخانی و جە و وارێن خەلکێ هاتینە ژناڤ برن و ب گور ئاماران هەتا کو بەری رویدانا گوندێ پەرەخێ ژی، ١٨٠ کەس ل چەند ساڵێن بوری دا و ژئەنجامێ وان ھێرشان بریندار بووینە و ١٢٩ کەسان ژی گیانێن خۆ ژدەست داینە، لێ بابەتێ گوندێ پەرەخێ جوداھی ب خۆڤە دیت، چونکە بابەتێ گەشتیاران بوو، ژلەوما ژی حکومەتا هەرێما کوردستانێ و هەر ئێک ژبارەگایێ سەروک مەسعود بارزانی هەروەسا سەروکێ هەرێما کوردستانێ نێچیرڤان بارزانی سەروک وەزیرێن هەرێما کوردستانێ مەسرور بارزانی، پەیامێن جودا هەبوون و حکومەتا عیراقێ ژی پەیامێن جودا و دژوار هەبوون.
دئامارێن ھێرشێ دا دیاربوو کو ١٦ کەس ژتێکرایێ ٣٣ کەسان ل نەخوشخانەیا تەنگاڤیان ل زاخۆ هاتنە نڤاندن بۆ وەرگرتنا چارەسەرییا بلەز، و ٨ کەس ژی بۆ نەخۆشخانەیا هەوارهاتنا بلەزیا دھۆکێ هاتنە رەوانەکرن، هەڤەم، ٨ کەسان هەر ل جهێ رویدانێ گیانێن خۆ ژدەست دان و کەسەک دی ژی درێکا نەخۆشخانەیێ دا، ئانکو دئەنجام دا ٩ کەسان گیانێ خۆ ژدەست دا و بچویکترین قوربانییاڤێ رویدانێ کچەکا ١ سالی بوو.
ل رۆژا پێنج شەمبیا بوری، درێوەرسمەکێ دا و ب ئامادەبوونا پارێزگارێ پارێزگەها دھۆکێ، و رێڤەبەرێ ئاسایشا پارێزگەها دھۆک و رێڤەبەرێ پولیسێن دھۆک دگەل رێڤەربەرێ هاتن و چوونا دھۆک هەر ٩ تەرمێن قۆربانییان رەوانەکرن بۆ فروکخانەیا نیڤدەولەتییا هەولێرێ، و ل وێرێ ب ئامادەبوونا سەروکێ هەرێما کوردستانێ نێچێرڤان بارزانی و سەروک وەزیران مەسرور بارزانی و وەزیرێ ئەوقافا هەرێمێ پشتیوان سادق و چەند بەرپرسێن حکومی، ب فروکەیەکا سەربازی و ل ژێر ھندەک رێوەرسمان ئەو تەرم بۆ فروکخانەیا بەغداد هاتنە رەوانەکرن.
ل پێش ئەنجامدانا مەراسیمێن رەوانەکرنا تەرمان سەروکا دەستەیا گەشت و گوزارییا هەرێما کوردستانێ سەرەدانا هەردوو نەخۆشخانەیێن دھۆک و زاخۆ کر ژبۆ هایداربوون ژرەوشا نەخۆشان و کونگرەیەکێ رۆژنامەڤانی ئەنجام دا و تێدا دووپات کر کو ئەو گوندێ رویدان لێ رویدایی جهەکێ گەشتیارییە و بەردەوام گەشتیار سەرەدانا وی گوندی و ھندەک گوندێن دەوروبەر دکەن.
هەروەسا گۆھدار شێخۆ رێڤەبەرێ ئیدارا سەربوخۆیا زاخۆ ئەڤ چەندە شەرمزار کر و دیارکر کو ئەڤ ھێرشە چەندین جاران ل سەر خەلکێ سڤیلێ ناوچێن هەرێمێ و تایبەت ل سنوورێ زاخۆ هاتینە ئەنجامدان و کارڤەدانەک مەزن ل سەر رەوشا وان ناوچان کرییە.
ژچیروکێن کاریگەرێن رویدانێ خێزانەکا عەرەب ب تنێ ئەو سێ رۆژبوو هەڤژینی پێک ئینایی و بۆ هەیڤا ھنگڤینی ئەوان سەرەدانا کوردستانێ کربوو و ژئەنجامێ توب بارانکرنێ زاڤایی گیانێ خۆ ژدەست دا.
دوهی ل پەرلەمانێ کوردستانێ کومبوونەک تایبەت ل سەر رویدانا پەرەخێ هاتە ئەنجامدان بۆ ھندێ ئەگەرێن ھوی رێنڤێ توب بارانکرنێ بهێنە دیارکرن هەروەسا ئەو چ رێکارێنیاسایی نەیێن بھێنە کرن بۆ ھندێ سنوورەک بۆ ئوپەراسیونێن پەکەکێ و سوپایێ تورکی بهێتە دانان و ئەردێ هەرێما کوردستانێ و خەلکێ وێ دئەنجامێن شەریدا نە بنە ئارمانج.
ب گور ئامارێن دویماھیێ دنووکەدا ب تنێ ٤ نەخۆش ل نەخۆشخانا تەنگاڤییا زاخۆ ماینە و رەوشا وان گەلەک باشە ب گور گوتنا رێڤەبەرێ ساخلەمییا زاخۆ، لێ ئەوان ل دویف داخوازییا خۆ حەز کرییە چارەسەرییا خۆ ل زاخۆ وەربگرن و یێن دی ژی بۆ بەغداد هاتینە رەوانەکرن.
پشتی رویدانا پەرەخێ چەندین توپ هاتینە باراندن و ل سێ شەڤێن بوری دا ل ناحییا کانی ماسێ ل دێریشکێ شەرەکێ دژوار دناڤ بەرا هەردوو ھێزێن پەکەکێ و سوپایێ تورکیدا هاتییە کرن هەروەسا ل بامەرنێ و دێرەلوک و شێلادزێ و سنوورێن زاخۆ بەردەوام شەر هەیە.