کریارەکا تێکدەرانە

دوێنێ پشتی نیڤرو بنگەهەکێ پەخشا رادیو و تێلەفزیونا دهوک ل چیایێ بێخێری ل هنداڤی گەلیێ زاخو کەفتە بەر هێرشەکا موشەکی یا چەکدارێن پ ک ک ێ، د ئەنجامدا زیانێن مادی ب ئاڤاهی و دەزگەهێن بنگەهی کەفتینە، و خوشبەختانە چ زیانێن گیانی نەبوون.

دەمەکی دا ئەم ڤێ کریارا تێکدەرانە یا تیرورستیی رسوا و شەهمزار و مەحکوم دکەین، ئەم ئاگەداریا ئەنجامدەرێن وێ کریارێ دکەین، کو ئەڤ بنگەهێ پەخشیێ میدیایی نیشانەکا شارستانیەتێ و پێشکەفتنا هەرێما کوردستانێ یە و خزمەتا مللەتێ کوردستانێ و دوزا رەوایا وێ دکەت، چ گەفێ و مەترسیێ ل سەر چ لایەنا دروستناکەت و چ بهانە بو ئارمانجگرتنا وێ نینە، و ئەڤ جورە کریارە دەنگ و رەنگ و پەیاما مە ناراگریت، هیڤیە پ ک ک د سیاسەتا خو یا شاس دا بجنەڤە و گورەپانا خو یا خەباتێ بزانن و لوێرێ چالاکیێن خو بکەت.. کوردستانا باکور روبەرەکێ مەزنترە و باژێرێن وێ پترن و مروڤێن وێ بوشترن و چیایێن وێ بلندترن و گەلیێن وێ کیرترن و خەلکێ وێ یێ پێتڤی ئازادیێ یە.
ئەڤ جورە کریارە دژی سازیێن هەرێما کوردستانێ تنێ خزمەتا دژمن و داگیرکەرێن کوردستانێ دکەن، دەم هاتیە پ ک ک دەستی ژ هەرێما کوردستانێ هەلینیت وقەستا وی جهی بکەن یێ پێتڤی ب خەبات و رزگاریێ.

ناڤەنا خانی یا روشەنبیری و راگەهاندنێ