سەرۆکی پێشووی کۆمسیۆنی باڵای سەربەخۆی ھەڵبژاردنەکانی عێراق گوتی، ئەوەی گرنگە ھەڵبژاردنی پەرلەمانی کوردستان لە کاتی خۆیدا ئەنجام بدرێت و ئەگەر یەک بازنەش بێت لە بەرژوەندیی ھەموو لایەکدایە و ئەندام پەرلەمانەکانیش نابنە نوێنەری تەنها ناوچەیەک و دەبنە نوێنەری ھەموو خەڵکی کوردستان.
سەربەست مستەفا بۆ ماڵپەڕی فەرمیی پارتی دیموکراتی کوردستان گوتی: ”گرنگیی یەک بازنەیی لە ھەڵبژاردنەکاندا ئەوەیە کە ئەوانەی دەبنە ئەندام پەرلەمان دەبنە نوێنەری ھەموو خەڵکی کوردستان نەک تەنھا ناوچەیەک و جگە لەوەش، یەک بازنەیی لە بەرژوەندیی ھەموو حیزبەکان بەگشتیدایە و بەتایبەت حیزبە بچووکەکان کە دەنگەکانیشیان کۆ دەبنەوە، بۆیە یەک بازنەیی لە بەرژوەندیی گشتیدایە و دەشکرێت فرە بازنەی بێت.”
سەرۆکی پێشووی کۆمسیۆنی باڵای سەربەخۆی ھەڵبژاردنەکانی عێراق گوتیشی: ”ئەوە سیستەمی ھەڵبژاردن دیاریی دەکات و حزبەکان داوا دەکەن لە سەرتاسەری ھەرێم دەنگ کۆ بکەنەوە و لە بەرژوەندیی حیزبە بچووکەکانیشدایە و سوودی زۆری ھەیە، بەڵام دوو بۆچوون ھەیە، هەندێک پێیان باشە نوێنەرەکان تەنھا نوێنەری ناوچەیەک بن و ھەندێکیش پێیان وایە ھەرێمی کوردستان یەک ھەرێمە و پێویستە نوێنەرەکان نوێنەری ھەموو ھەرێم بن، نەک تەنھا یەک ناوچە لە ھەرێمی کوردستان، بۆیە باشترە نوێنەری ھەموو ھەرێمی کوردستان بن.”
سەربەست مستەفا باسی لەوەش کرد: ”ئەگەر یەک بازنەیی بێت دەنگی ھەموو حیزبەکان لە ھەموو ناوچەکان کۆ دەکرێنەوە و لەو ناوچانەی کەمن و لەو ناوچانەی زۆریشن، بۆیە دەنگیان بەفیڕۆ ناچێت و ڕەنگە کورسییشیان زیاد بێت، بەڵام لە فرەبازنەییدا بەو شێوەیە نییە، مەگەر ھاوپەیمانی دروست بکەن”.
گوتیشی: ھەر حیزبێک قەبارە و ھێزی خۆی دەزانێت و دەزانێت چۆن بەشداری دەکات، بەڵام لەسەر ڕێککەوتنی لایەنەکان دەمینێتەوە کە چۆن لەسەری دەگەنە ڕێککەوتن و ئەوەی گرنگە ھەڵبژاردن لە کاتی خۆیدا بکرێت.