ستار ئه‌حمه‌د/ كه‌ركوك
زۆر حه‌ز ئه‌كه‌یت
هه‌ڵبه‌ستێكت بۆ بنووسم
باسی پاكی و وه‌فات بكا
بۆ دڵسۆزیت وه‌ك دێوانه
بكه‌وێته پرسه‌ی تكا
- *
كه‌ی ئه‌توانم
له‌نێو ده‌ریای دیده‌كانت
بكه‌ومه هه‌وڵی مه‌له
گه‌واڵه‌ی ژان نه‌هه‌نگێكه
بۆ ئه‌و رۆژه‌ی روو له‌كه‌له - *
گوێ ڕادێره بۆ به‌سته‌یه‌ك
له‌دووی ئه‌شكت دۆش داماوه
بۆ پێنووسێك له ئاست وه‌فات
خوێنی جه‌رگی فرمێسك چاوه - *
ده‌سته‌وه‌ستان ڕامه‌مێنه
تۆ ئاوازی به‌سته‌ی ناخی
كه‌ی باخه‌وان دڵشاد نابێ
مه‌ل بخوێنێ له‌نێو باخی؟ - *
بجریوێنه…
ئه‌ی باڵداره نه‌خشینه‌كه‌م
تۆ داستانی ئه‌وینێكی
ده‌ست ئه‌خاته بینی ماته‌م - *
قوربانییه. ناونیشانم
كۆتاییه‌كه‌ی پێكگه‌یشتن
هێز ناتوانێ له‌یه‌كمان كات
مه‌گه‌ر كانی گڕی مردن - *
هه‌تا ماوین له‌دونیادا
بۆیه‌ك ئه‌ژین به‌خاوێنی
ته‌نها هه‌رتۆی كۆرپه‌ی هه‌ستم
له‌نێو جه‌رگت ئه‌لاوێنی - *
ده‌به‌رۆكت بكه‌ره‌وه
باده‌م له‌سه‌ر سنگت دانێ
ته‌نها ئه‌وه له‌كزه‌ی جه‌رگ
كڵپه‌ی ناخی تۆ ئه‌زانێ - *
ئه‌و نۆبه‌ره‌ی ئه‌وینێكه
كاره‌ساتی نابڕێته‌وه
چرۆیه‌كه له‌نێو گۆڕمان
له‌و دونیادا ئه‌شنێته‌وه - *
به‌ڕووی خه‌ما پێئه‌كه‌نێ
به‌هه‌شت به ئه‌و گوڵ نه‌خشینه
ئه‌مه‌یه به‌رهه‌می وه‌فا
كه هاوڕازی دوو ئه‌وینه