په‌یامێكی توند له موقته‌دا سه‌دره‌وه
موقته‌دا سه‌در، رێبه‌ری ره‌وتی سه‌در، په‌یامێكی توند ئاراسته‌ی لایه‌نه سیاسییه‌كانی ناو چوارچێوه‌ی هه‌ماهه‌نگی ده‌كات و تێیدا ده‌ڵێت: “ته‌وافوق له‌گه‌ڵ ئێوه واتا كۆتایی وڵات”.
موقته‌دا سه‌در، له هه‌ژماری فه‌رمی خۆی له تۆڕی كۆمه‌ڵایه‌تی تویته‌ر نووسیویه‌تی: “ته‌وافوق له‌گه‌ڵ ئێوه (چوارچێوه‌ی هه‌ماهه‌نگی) ناكه‌م و ته‌وافوق له‌گه‌ڵ ئێوه واتا كۆتاییهاتنی وڵات”.
له به‌شێكی دیكه‌ی تویته‌كه‌یدا، سه‌در ئاماژه به‌وه ده‌كات، ئه‌وه‌ی پێیده‌گوترێت داخرانی سیاسی، ساناتره له ته‌وافوق له‌گه‌ڵ ئێوه (چوارچێوه‌ی هه‌ماهه‌نگی) و باشتریشه له‌وه‌ی “كێك له‌گه‌ڵ ئێوه به‌ش بكه‌م”.
هه‌روه‌ها ده‌ڵێت: “هیچ خێرێك له حكومه‌تی ته‌وافوقی و پشك پشكێنه‌دا نییه، چۆن ته‌وافوق له‌گه‌ڵ كوتله‌كان ده‌كه‌ن كاتێك ئێوه ده‌ستدرێژی ده‌كه‌نه سه‌ر ته‌واوی پێكهاته‌كان و هه‌موو هاوبه‌شه‌كان، كه ده‌تانه‌وێ بیانخه‌نه ریزی خۆتانه‌وه”.
موقته‌دا سه‌در هه‌ر له تویته‌كه‌یدا، په‌یامێك ئاراسته‌ی گه‌لی عێراق ده‌كات و ده‌ڵێت: “ئه‌ی گه‌لی عێراق، ناتانگه‌ڕێنمه‌وه ناو مه‌رگه‌ساتی پێشوو، ئه‌وه به‌ڵێنێكه و درۆی تێدا نییه. نیشتمان ملكچه‌ی پاشكۆیی و داگیركاری و پشك پشكێنه نابێت، به هیچ شێوه‌یه‌ك گه‌ل له‌به‌رده‌میان ناچه‌مێت”.
